Sheetal Mhatre On ShivsenaUBT: ‘सिल्व्हर ओक’ने आवाज चढवला, ‘मातोश्री’चा चेहरा पडला…; शिंदे गटाचा जिव्हारी लागणारा घाव

Mumbai News : आगामी विधानसभा निवडणुकीसाठी महाविकास आघाडीच्या मुख्यमंत्रिपदाचा चेहरा ठरवण्यात यावा, बिनचेहऱ्याचं सरकार अजिबात चालणार नाही, अशी भूमिका शिवसेना ठाकरे गटाचे पक्षप्रमुख उद्धव ठाकरे यांच्यासह खासदार संजय राऊतांनी मांडली होती.एव्हाना दिल्लीत काँग्रेस पक्षश्रेष्ठींसमोरही उद्धव ठाकरे (Uddhav Thackeray) यांनी मविआचा मुख्यमंत्रिपदाचा चेहरा ठरवण्याबाबत आग्रही भूमिका मांडली होती.

मात्र, आता राष्ट्रवादी काँग्रेस शरदचंद्र पवार पक्षाचे नेते शरद पवार यांच्यासह काँग्रेस नेते नाना पटोले यांनीही विधानसभा निवडणुकीच्या निकालानंतरच्या संख्याबळावर मविआचा मुख्यमंत्री ठरवण्यात येईल असं विधान केले आहे. त्यामुळे एकप्रकारे ठाकरेंची मागणी धुडकावून लावल्याचे बोलले जात आहे.यावरुन आता शिंदे गटाच्या महिला नेत्या शीतल म्हात्रे यांनी ठाकरे गटाला डिवचलं आहे.

...आणि चेहरा काळाठिक्कर पडला!

शिंदे गटाच्या आक्रमक महिला नेत्या शीतल म्हात्रे यांनी सोशल मीडियावरील X या प्लॅटफॉर्मवर पोस्ट केली आहे. यात त्यांनी उद्धव ठाकरे गटावर खोचक टिप्पणी केली आहे. त्या पोस्टमध्ये म्हणतात, ‘सिल्व्हर ओक’ने आवाज चढवला, ‘मातोश्री’चा चेहरा पडला. चेहरा ठरवा..चेहरा ठरवा... असा धोशा लावणाऱ्या उबाठाचे तोंड काळे पडले.

निवडणुकीनंतर संख्याबळावरच मुख्यमंत्री (Chief Minister) पदाचा चेहरा निवडला जाईल, असा स्वच्छ निर्वाळा माननीय पवारसाहेबांनी दिल्यानंतर उबाठाचा ‘फेस’ फेसबुकवर येण्या इतक्याही लायकीचा राहिला नाही अशी ठाकरे गटाच्या जिव्हारी लागणारी पोस्ट केली आहे.

तसेच सुंठीवाचून खोकला गेला,या म्हणीनुसार काँग्रेस नेतृत्वाला आनंदाच्या उकळ्या फुटल्या आहेत !कारण निवडणूक जाहीर होण्याआधीच उबाठाचा पत्ता कट झाला आहे असाही टोला शीतल म्हात्रे यांनी सोशल मीडियावरुन ठाकरे गटाला लगावला आहे.

महाविकास आघाडीमध्ये मुख्यमंत्रीपदाचा चेहरा निवडणुकीपूर्वी ठरवायचा की निवडणुकीनंतर यावरून चढाओढ सुरू असल्याचं दिसून येत आहे. शिवसेना ठाकरे गटाचे पक्षप्रमुख उद्धव ठाकरे यांनी निवडणुकीपूर्वी महाविकास आघाडीतील सर्व पक्षाने एकमताने मुख्यमंत्री पदाचा चेहरा निवडावा अशी भूमिका घेतली आहे.

यामुळे निवडणुकीमध्ये त्याचा फायदा होईल असं ठाकरे यांचं म्हणणं आहे. त्यावर राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी आपली भूमिका मांडली असून त्या भूमिकेला काँग्रेसचे प्रदेशाध्यक्ष नाना पटोले यांनी देखील सहमती दर्शवली आहे.

शरद पवार काय म्हणाले होते..?

शरद पवार यांनी कोल्हापूरमध्ये मीडियाशी संवाद साधला. यावेळी शरद पवारांनी मविआच्या मुख्यमंत्रि‍पदावर भाष्य केले. ते म्हणाले, मुख्यमंत्रि‍पदाचं घोडे कुठेही अडलं नाही.निवडणुकीनंतर संख्याबळावर नेतृत्वाबाबत निर्णय घ्यायचा असतो. अजून कशाचाही पत्ता नाही.महाविकास आघाडीला बहुमत मिळेल,असं वातावरण आहे.पण,मुख्यमंत्रि‍पदाबाबत आताच मांडणी करण्याची आवश्यकता नाही असंही पवार यांनी यावेळी सांगितले.

यावर काँग्रेसचे प्रदेशाध्यक्ष नाना पटोलेंना प्रश्न विचारला. ते म्हणाले, शरद पवार बोलले ते बरोबरच आहे. निवडणुकीनंतर कोणाचं किती संख्याबळ आहे. त्यानुसारच मुख्यमंत्रिपदाचा चेहरा ठरवणं योग्य ठरणार आहे. मात्र, याबाबत उद्धव ठाकरेंनी मुख्यमंत्रिपदाचा निर्णय जाहीर करण्याच्या मागणीबाबत आधीच बोलून झालंय आहे,असं म्हणत पटोले यांनी पवारांच्या वक्तव्याला सहमती दर्शवली आहे.