Shivens-MNS Alliance: आता राज ठाकरेही म्हणताहेत युती झाल्याशिवाय राहणार नाही! ठाकरे इफेक्ट अन् महाराष्ट्राच राजकारण वेगळ वळणं घेतंय?

Shivens-MNS Alliance: मुंबई महापालिकेची निवडणूक अद्याप जाहीर झालेली नाही, पण येत्या काही महिन्यात ती जाहीर होईल. याचा काळ जस जसा जवळ येत चालला आहे. तसंतसं राज्याच्या राजकारणातील ठाकरे इफेक्ट अधिकाधिक जाणवायला लागला आहे. मराठीच्या मुद्द्यावरुन दोन्ही ठाकरे बंधू एकत्र आले आहेत. पण अद्याप त्यांच्या दोन्ही पक्षांच्या युती जाहीर झालेली नाही. या युतीसाठी उद्धव ठाकरे इच्छुक आहेत तशी घोषणाही त्यांनी यापूर्वीच केली आहे. पण राज ठाकरे मात्र याबाबत अत्तापर्यंत मौन होते, पण आता त्यांनीही मनसे-शिवसेना युतीचे संकेत दिले आहेत. शुक्रवारी मीरा रोड इथं झालेल्या सभेमध्ये राज ठाकरेंनी युती झाल्याशिवाय राहणार नाही असं विधान एका वेगळ्याचं मुद्द्यावरुन केलं पण त्याचा संदर्भ हा मनसे-शिवसेनेच्या युतीशी जोडला जात आहे.

मीरा रोडच्या सभेत राज ठाकरे म्हणाले की, आपण अमराठी लोकांबद्दल बोललो तर त्याची राष्ट्रीय बातमी होते. पण जेव्हा हेच अमराठी लोक काही बोलतात तर काहीही होत नाही. कारण यांना माहिती असतं की सरकार यांच्या मागे आहे. जर महाराष्ट्र सरकारचं हिंदी भाषेच्या या गोष्टी इथं लादत असेल तर मग यांची हिंमत तर वाढणारच आहे. एक गोष्ट मी त्या दिवशी सांगितली आता पुन्हा एकदा सांगतो तुमची सत्ता असेल लोकसभेत आणि विधानसभेत आमची सत्ता रस्त्यावरती आहे, रस्त्यावरती. काही नाही छप्पन इंचाची तुम्हीपण छाती बाहेर काढून फिरा. हा महाराष्ट्र तुमच्या बापाचा महाराष्ट्र आहे. परत जर कोणी महाराष्ट्रात वेडंवाकडं वागायचा प्रयत्न केला तर माझा महाराष्ट्र सैनिक त्याचा गाल आणि त्याचा हात या सगळ्यांची युती झाल्याशिवाय राहणार नाही.

राज ठाकरेंच्या या विधानाची आता सर्वत्र चर्चा सुरु झाली आहे. मराठी विजयी मेळाव्यात उद्धव ठाकरेंनी हे जाहीर केलं होतं की आम्ही एकत्र आलो आहोत एकत्र राहण्यासाठी. त्यानंतर आता राज ठाकरेंनी मराठीचा मुद्दा आक्रमकपणे लावून धरला आहे. आम्ही हिंदू आहोत पण हिंदी नाही अशी घोषणाही त्यांनी दिली. त्यामुळं महाराष्ट्रात मराठीच्या संरक्षणासाठी आणि संवर्धनासाठी आता मराठी भाषेचं राजकारण खऱ्या अर्थानं सुरु झालं आहे. यामध्ये मराठी माणसाचा रोजगार आणि अस्तित्व याच्या मुद्द्यावरुन जन्म झालेल्या शिवसेनेसोबत राज ठाकरे पुन्हा एकदा हातमिळवणी करतील असे संकेत दिले आहेत. म्हणूनच जेव्हा अमराठी लोकं महाराष्ट्रात वेडंवाकडं वागतील तेव्हा युती झाल्याशिवाय राहणार नाही, असं त्यांनी म्हटलं आहे.