Shivsena Politics: पिता-पुत्र निवडणुकीच्या रिंगणात; एक जण ठाकरेंचा तर दुसरा शिंदे सेनेचा उमेदवार!

Shivsena Politics: महापालिका निवडणुकांमध्ये विचित्र युत्या-आघाड्यांनी जनतेला गोंधळात टाकलेलं असताना काही उमेदवारांनी देखील आपण या राजकारणातले विचित्र खिलाडी आहेत, हे देखील सिद्ध केलं आहे. याचं उदाहरण म्हणजे गोवंडी महापालिकेसाठी पिता-पुत्रानं शिवसेनेकडून उमेदवारी अर्ज भरला पण यांपैकी एकानं ठाकरेंच्या शिवसेनेकडून तर दुसऱ्यानं शिंदेंच्या शिवसेनेकडून अर्ज भरला.

उभी फूट पडलेल्या आणि आता दोन स्वतंत्र पक्ष म्हणून ओळख मिळालेल्या या पक्षांकडून एकाच घरातल्या नव्हेतर तर चक्क मुलगा आणि वडिलांनी अर्ज भरल्यानं त्याची खूपच चर्चा होत आहे.

वडील महादेव आणि पुत्र अमोल अंबेकर या दोघांना दोन्ही शिवसेनेकडून एबी फॉर्म मिळाले. त्यामुळं या दोघांनी एकाच महापालिकेसाठी दोन वेगवेगळ्या शिवसेनेकडून आपला उमेदवारी अर्ज दाखल केला. पण या दोन्ही शिवसेना सध्या एकमेकांच्या नंबर एकच्या शत्रू असून केंद्रापासून राज्यात तसंच स्थानिक स्वराज्य संस्थांमध्येही त्या एकमेकांच्याविरोधात उभ्या आहेत. त्यामुळं अंबेकर पिता-पुत्र या निवडणूक एकमेकांच्या विरोधात उभे ठाकले आहेत.

दरम्यान, गोवंडी महापालिकेत प्रभाग क्रमांक १३८ मधून मुलगा डॉ. अमोल अंबेकर यांना शिंदेंच्या शिवसेनेनं तिकीट दिलं आहे. त्यांचा उमेदवारी अर्ज दाखल करताना पक्षाचे मुख्य नेते आणि राज्याचे उपमुख्यमंत्री एकनाथ शिंदे हे देखील उपस्थित होते. तर दुसरीकडं पिता महादेव अंबेकर यांना ठाकरेंच्या शिवसेनेनं तिकीट दिलं असून ते वेगळ्या वॉर्डमधून निवडणूक लढवणार आहेत.