Shivsena Politics : "सगळं ठरलंय! राऊतांमुळे 'उबाठा'चा सत्यानाश, 2 आमदार वगळता इतर सर्वजण दसऱ्यानंतर..."; शिंदेंच्या आमदाराचा खळबळजनक गौप्यस्फोट

Mumbai News, 09 Sep : शिवसेनेतील बंडानंतर उद्धव ठाकरेंच्या शिवसेनेतील अनेक आमदार खासदारांसह पदाधिकाऱ्यांनी देखील एकनाथ शिंदेंच्या शिवसेनेत प्रवेश करणं पसंद केलं. शिवाय विधानसभा निडवणुकीत महायुतीची सत्ता आल्यापासून हे प्रवेश मोठ्या प्रमाणात सुरूच आहेत.

तर आगामी स्थानिक स्वराज्य संस्थांच्या निवडणुका आणि मुंबई महानगर पालिकेची निवडणूक डोळ्यांसमोर ठेवून शिंदेंच्या शिवसेनेने ठाकरेंच्या अनेक पदाधिकाऱ्यांना पक्षात येण्याची ऑफर दिल्याचं बोललं जात आहे.

अशातच आता स्थानिक आणि मुंबई महापालिकेच्या निवडणुकीपूर्वी उपमुख्यमंत्री एकनाथ शिंदेंच्या शिवसेनेचे आमदार कृपाल तुमाने यांनी एक खळबळजनक दावा केला आहे. त्यांच्या या दाव्यामुळे काही दिवसांत राज्याच्या राजकारणात मोठी उलथापालथ होण्याची शक्यता आहे.

आमदार कृपाल तुमाने यांनी म्हटलं की, दोन आमदार सोडले तर उर्वरीत सर्व आमदार आणि मुंबई महापालिकेतील जवळपास 80 टक्के उरलेले सर्व माजी नगरसेवक आमच्या संपर्कात असून ते एकनाथ शिंदेंच्या नेतृत्वाखाली काम करण्यासाठी तयार आहेत. त्यामुळे दसरा मेळावा झाल्यानंतर आम्ही ठाकरेंना दणका देणार आहोत.

तसंच ठाकरे गटाचे खासदार संजय राऊत यांच्या भूमिकेवर अनेक आमदार नाराज असल्याचंही तुमाने यांनी म्हटलं आहे. ते म्हणाले, खासदार संजय राऊतांना सगळे कंटाळले असून राऊतांमुळे उबाठाचा सत्यानाश झाला आहे. शिवसेनेसाठी दसऱ्याचा दिवस महत्वाचा असतो आणि याच दिवशी पक्षाशी संबंधित अनेक मोठ्या घोषणा झाल्या आहेत, असं सांगत त्यांनी दसऱ्यानंतर शिवसेनेत मोठे पक्षप्रवेश होणार असल्याचंही यावेळी सांगितलं.

तुमाने यांच्या या दाव्यामुळे आता राजकीय चर्चांना उधाण आलं असून मुंबई महापालिका निवडणुकीपूर्वी ठाकरे गटाला आणखी एक मोठा धक्का बसणार का? अशा चर्चा सुरू झाल्या आहेत. त्यामुळे आमदार कृपाल तुमाने यांच्या या दाव्यावर ठाकरे गट काय प्रतिक्रिया देणार हे पाहणं महत्वाचं ठरणार आहे.