फडणवीसांच्या चौकशीवर राऊतांची टीका; म्हणाले, कायद्यापुढे सगळे समान मग हा तमाशा का?

मुंबई : भाजप नेते आणि विधानसभेतील विरोधी पक्षनेते देवेंद्र फडणवीस (Devendra Fadnavis) यांची मुंबई पोलिसांच्या सायबर गुन्हे शाखेकडून फोन टॅपिंग आणि पोलिस बदली भ्रष्टाचार प्रकरणातील गोपनीय महिती उघड केल्याप्रकरणी सुमारे दोन तास चौकशी करण्यात आली. मात्र, ही चौकशी सुरु असताना शिवसेना नेते आणि खासदार संजय राऊत (Sanjay Raut) यांनी एक ट्विट करत फडणवीस आणि भाजपवर (BJP) जोरदार टीका केली आहे. फडणवीसांच्या बंगल्यावर जाऊन करण्यात आलेली चौकशी राऊतांना आवडली नसल्याने त्यांनी याबाबत आपली नाराजी व्यक्त करत लोकशाहीत विशेष अधिकार कोणालाच नसतो. कायद्यापुढे सगळे समान आहेत. मग हा तमाशा का? असा सवाल उपस्थित करत भाजप आणि फडणवीसांवर टीका केली आहे.

राऊत आपल्या ट्विटमध्ये म्हणाले की, कमाल आहे! काही लोक व काही राजकीय पक्ष स्वता:ला कायद्यापेक्षा मोठे का समजत आहेत? महाराष्ट्रात अनेक मंत्री आणि लोकप्रतिनधींनीना राजकीय सुडा पोटी केंद्रीय तपास यंत्रणांनी चौकशीला बोलावले व ते हजर झाले. लोकशाहीत विशेष अधिकार कोणालाच नसतो. कायद्यापुढे सगळे समान आहेत. मग हा तमाशा का?, असे आपल्या ट्विटमध्ये म्हटले आहे. राऊतांच्या या टीकेवर भाजपकडून काय उत्तर येते हे बघणे महत्वाचे ठरणार आहे.

दरम्यान, फडणवीस यांची चौकशी सुरू असताना राज्यभरात भाजपकडून आंदोलन केले जात होते. पोलिसांनी फडणवीसांना पाठवलेल्या नोटीशीची भाजप कार्यकर्त्यांकडून होळीही करण्यात आली. तर भाजपचे प्रमुख नेते फडणवीसांच्या बंगल्यावर उपस्थित आहेत. डीसीपी हेमराज सिंग राजपूत, एसीपी नितीन जाधव आणि दोन पोलीस निरीक्षकांच्या पथकाने फडणवीसांचा जबाब नोंदवला. या चौकशीतून काय निष्पन्न होणार याकडे सर्वांचे लक्ष लागले असतांना फडणवीस माध्यमांशी बोलणार असून यावर काय प्रतिक्रिया देतात हे बघणे महत्वाचे ठरणार आहे.