Tejasvee Ghosalkar : संचालक होताच तेजस्वी घोसाळकरांचे सूर बदलले; म्हणाल्या, 'राजकीय नजरेतून...' टार्गेटवर भाजप की उद्धव ठाकरे?

Tejasvee Ghosalkar News : मुंबई जिल्हा मध्यवर्ती सहकारी बँक भाजपच्या ताब्यात आहेत. शुक्रवारी या बँकेच्या संचालकपदी तेजस्वी घोसाळकर यांची नियुक्ती करण्यात आली. त्यांचे पती अभिषेक घोसाळकर यांच्या निधनाने रिक्त असलेले संचालकपद तेजस्वी यांना मिळाले. तेजस्वी यांनी काही दिवासांपूर्वीच शिवसेना उद्धव बाळासाहेब ठाकरे पक्षाच्या पदांचा राजीनामा दिला होता. मात्र, त्यांचे सासरे विनोद घोसाळकर यांनी आपण आणि तेजस्वी ही उद्धव ठाकरेंसोबत असल्याचे सांगितले होते.

तेजस्वी यांची संचालकपदी नियुक्ती झाल्यानंतर त्यांनी सोशल मीडियावर एक पोस्ट केली आहे. त्यामध्ये म्हटले आहे की, एका वर्षापूर्वीच मी व माझे सासरे विनोद घोसाळकर आम्ही दरेकर साहेबांना भेटून याबाबत विनंती केली होती.

सहकारात राजकीय पक्षाचे जोडे बाहेर ठेवून काम करणे हाच खरा सहकार धर्म आहे, त्यामुळे या निर्णयाकडे राजकीय नजरेतून पाहणे अत्यंत चुकीचे ठरेल, असे म्हटले आहे. त्यामुळे त्यांनी या नियुक्तीकडे राजकीय नजरेने न पाहण्याचा सल्ला उद्धव ठाकरे यांना दिला आहे की भाजपला याची चर्चा सुरू आहे.

विनोद घोसाळकर यांनी संजय राऊत यांच्यासोबत पत्रकार परिषद घेत त्यांना भाजप किंवा शिंदेंच्या शिवसेनेत प्रवेश करण्यासाठी दबाब असल्याचे सांगितले होते. तसेच आपण उद्धव ठाकरेंसोबत राहणार असल्याचे देखील त्यांनी स्पष्ट केले होते. घोसाळकरांच्या पत्रकार परिषदेनंतर अवघ्या काही दिवसांत त्यांची सून तेजस्वी यांची मुंबई बँकेंच्या संचालकपदी नियुक्ती झाल्याने भाजप त्यांना आपल्या पक्षात घेण्यासाठी पाऊले टाकत असल्याची चर्चा सुरू झाली आहे.

प्रवीण दरेकरांचे मानले आभार

तेजस्वी घोसाळकर यांनी आपल्या सोशल मीडियावरील पोस्टमध्ये प्रवीण दरेकर यांचे आभार मानले आहेत. त्यांनी म्हटले आहे की, माझे पती अभिषेक घोसाळकर यांच्या रिक्त असलेल्या मुंबई जिल्हा मध्यवर्ती सहकारी बॅंकेच्या संचालक पदावर माझी एकमताने निवड केल्याबद्दल मी बॅंकेचे अध्यक्ष प्रविणभाऊ दरेकर तसेच सर्व संचालक मंडळाचे मनापासून आभार मानते.हा माझा सहकार क्षेत्रातील एक महत्त्वाचा व पहिलाच अध्याय आहे, मात्र माझ्या परिवाराने आजवर केलेल्या कामाचा अनुभव व अभिषेक यांच्या जवळ राहून मिळालेल्या ज्ञानाचा उपयोग करून मी चांगले काम करेल याची खात्री देते.