Maharashtra Politics Video : राज ठाकरे-एकनाथ शिंदे एकत्र येणार? उदय सामंतांच्या भेटी मागचे रहस्य सांगितले

Uday Samant News : मंत्री उदय सामंत यांनी आज (शनिवारी) राज ठाकरेंची भेट घेतली. अचानक उदय सामंत हे राज ठाकरेंच्या निवासस्थानी पोहोचल्याने मोठ्या राजकीय घडामोडी घडणार असल्याची चर्चा होती. महापालिका निवडणुकीमध्ये राज ठाकरे आणि एकनाथ शिंदे एकत्र येणार असल्याच्या देखील चर्चा होत्या. त्यामुळे उदय सामंत यांनी या संदर्भात राज ठाकरे यांची भेट घेतली का? असा प्रश्न त्यांना पत्रकारांनी विचारला असता त्यांनी भेटी मागचे कारण सांगितले.

पत्रकारांनी राज ठाकरे आणि एकनाथ शिंदे हे महापालिका निवडणुकांसाठी एकत्र येणार आहेत का? असा प्रश्न विचारला असता उदय सामंत म्हणाले, राजसाहेब आणि एकनाथ शिंदे एकत्र येणार का? हा माझ्यासाठी खूप मोठा विषय आहे. या चर्चेमध्ये मी कधीच पडलो नाही. माझ्या आवाक्यातील, मला झेपणारे प्रश्न विचारले तर मी उत्तर देऊ शकतो. राजसाहेब आणि शिंदे एकत्र येणार असतील तर त्या दोघांमध्ये चर्चा व्हायला हवी. आजची चर्चा ही राजकारण विरहीत होती.

उदय सामंत म्हणाले, राजसाहेबांच्या सोबतची भेट ही राजकीय नव्हती. माझ्या विनंतीवरून ते पुण्यामध्ये झालेल्या राजभाषा साहित्य संमेलनाला उपस्थित राहिले होते म्हणून मी त्यांचे आभार मानण्यास आलो होते. आमच्या भेटीमध्ये कुठलीही राजकीय चर्चा झाली नाही. मराठी भाषेविषयी काय करता येईल यासंदर्भात आम्ही चर्चा केली.

अमित शाह यांची उपमुख्यमंत्री यांची आज बैठक आहे. या बैठकीबाबत बोलताना सामंत म्हणाले.एकनाथ शिंदे यांची अमित शाहांसोबतची बैठक ही प्रशासकीय बाबींसाठी आहे.केंद्रामधून जास्तीत जास्त निधी कसा आणायचा याबाबत आहे. आणि अमित शाहासाहेबांच्या हस्ते 20 लाख लोकांना घर भेट देण्याचा हा उपक्रम आहे.

पालकमंत्रिपदावर तोडगा निघणार

नाशिक आणि रायगडच्या पालकमंत्रिपदाच्या तिढ्यावर लवकच तोडगा निघेल असे उदय सामंत म्हणाले. नाशिकचा कुंभमेळा 2027 ला आहे. त्यामुळे त्याआधी नक्की निघालेला असेल, अशी फिरकी देखील सामंत यांनी घेतली. तसेच माणिकराव कोकाटे यांना झालेल्या शिक्षेविषयी आपल्याकडे पूर्ण माहिती नसल्याने त्या प्रकरणावर बोलण्यास सामंत यांनी नकार दिला.