Sarita Khanchandani Case : पर्यावरणवादी कार्यकर्त्या सरिता खानचंदानी आत्महत्या प्रकरणी ठाकरेंच्या शिवसेनेच्या जिल्हाध्यक्षासह 5 जणांवर गुन्हा दाखल

Ulhasnagar News, 06 Sep : उल्हासनगरमधील सामाजिक कार्यकर्त्या सरिता खानचंदानी यांनी इमारतीच्या सहाव्या मजल्यावरून उडी घेत आत्महत्या केली होती. त्यानंतर पोलिसांनी या आत्महत्या प्रकरणाचा तपास सुरू केला असता धक्कादायक माहिती समोर आली आहे.

पोलिसांच्या तपासात सरिता खानचंदानी यांना काही लोकांनी आत्महत्येस प्रवृत्त केल्याचं उघडकीस आलं आहे. आत्महत्येपूर्वी त्यांनी लिहिलेल्या सुसाइड नोटवरून ठाकरेंच्या शिवसेनेचे कल्याण जिल्हाध्यक्ष धनंजय बोडारे यांच्यासह पाच जणांवर विठ्ठलवाडी पोलीस स्टेशनमध्ये गुन्हा दाखल करण्यात आला आहे. याबाबतची माहिती पोलिस उपायुक्त सचिन गोरे यांनी दिली आहे.

तर गुन्हा दाखल झाल्यानंतर धनंजय बोडारे हे गायब झाले आहेत. सरिता खानचंदानी यांनी आत्महत्येपूर्वी लिहिलेल्या सुसाईड नोटमध्ये धनंजय बोडारे, शिवानी फाळके, उल्हास फाळके, जिया गोपलानी आणि राज चांदवानी यांची नावे लिहिली आहेत.

मिळालेल्या माहितीनुसार, खानचंदानी यांचा जिया गोकलानी यांच्यासोबत काही वाद झाला होता. त्यानंतर जिया यांनी विठ्ठलवाडी पोलिसांत तक्रार केली. त्यानंतर पोलिसांनी सरिता यांच्यावर गुन्हा दाखल केला होता. त्यानंतर दुसऱ्याच दिवशी सरिता यांनी एका इमारतीवरून उडी मारून सरिता यांनी आत्महत्या केली.

दरम्यान, आत्महत्येच्या दुसऱ्या दिवसी पुरुषोत्तम यांनी त्यांच्या ऑफिसचे सीसीटीव्ही फुटेज तपासले. यामध्ये सरिता यांनी आत्महत्या करण्यापूर्वी साडे अकराच्या सुमारास डायरीमध्ये काही तरी लिहिल्याचं दिसलं. त्यानंतर डायरी शोधली असता त्यामध्ये त्यांनी इंग्रजीत सुसाइड नोट आढळली.

या डायरीत त्यांनी आपल्या आत्महत्येला जिया गोकलानी, उल्हास फाळके, धनंजय बोडारे, शिवानी शुक्ला, ॲड. राज चंदवानी हे जबाबदार असल्याचं लिहिलं आहे. तसंच मी जिया गोकलानीवर कोणताही अन्याय केला असून कोणत्याही मंडळाकडून, नेत्याकडून एक रुपयाही घेतला नाही.

मात्र, गोकलानी आणि उल्हास फाळके मला खोट्या केसमध्ये अडकवत असून त्यांनी मला मानसिक त्रास दिल्यामुळे मला माझे जीवन संपवावे लागत आहे, असं त्यांनी सुसाइड नोटमध्ये लिहिलं आहे. या सुसाइड नोटच्या आधारे आता ठाकरेंच्या शिवसेनेच्या जिल्हाध्यक्षावर गुन्हा दाखल करण्यात आला आहे.