Devendra Fadnavis News : मुख्यमंत्रिपदावर असताना असं करता येतं का? हे धोकादायक आहे...

Maharashtra politics : मुख्यमंत्री देवेंद्र फडणवीस यांचे फोटो असलेल्या जाहिराती महाराष्ट्रातील बहुतेक वृत्तपत्रांमध्ये प्रसिध्द झाल्या आहेत. ठिकठिकाणी होर्डिंगही लागले होते. त्यावर केवळ ‘देवाभाऊ’ एवढेच लिहिले होते. ही जाहिरात कुणी दिली, याचा काहीही उल्लेख नव्हता. त्यावरून महाराष्ट्रातील राजकारण तापले असून तर्कवितर्क लढविले जात आहेत. आम आदमी पक्षाचे प्रदेश उपाध्यक्ष विजय कुंभार यांनीही याबाबत प्रश्न उपस्थित केले आहेत.

विजय कुंभार यांनी सोशल मीडियात याबाबत पोस्ट केली आहे. त्यांनी म्हटले आहे की, या जाहिरातींची देवेंद्र फडणवीस यांना रॉयल्टी मिळालेली आहे का? त्यांचा फोटो मुख्यमंत्री म्हणून वापरलेला दिसत नाही तर खाजगी व्यक्ती म्हणून वापरल्यासारखा वाटत आहे. ते पूर्वी मॉडेल होते असं म्हटलं जातं. त्यामुळे कदाचित त्यांची परवानगी घेऊन फोटो वापरला असण्याची शक्यता नाकारता येत नाही.परंतु पदावर असताना असं करता येतं का?, असा सवाल कुंभार यांनी उपस्थित केला आहे.

ही जाहिरात नक्की कोणत्या उद्देशाने आणि कोणी दिली? काहीच अर्थबोध होत नाही. मुख्यमंत्र्यांचा फोटो वापरून करोडोंच्या निनावी जाहिराती होत आहेत आणि त्यांच्या मागे कोण आहे हे समजत नसेल तर ते धोकादायक असल्याचे कुंभार म्हणाले आहेत. जर फोटो परवानगी घेऊन वापरला असेल, तर तो कोणी वापरला, का वापरला हे स्पष्ट व्हायला हवं, अशी अपेक्षाही त्यांनी व्यक्त केली आहे.

अशा जाहिराती सर्वत्र म्हणजे राज्यभरातील वर्तमानपत्रे. होर्डिंग्ज,पोर्टल्सवर करण्यात आलेल्या आहेत, त्यावर करोडोंचा खर्च करण्यात आला आहे. असा खर्च निनावी होणं योग्य नाही. त्यामुळे मुख्यमंत्र्यांनी याचा शोध घेतला पाहिजे, अशी अपेक्षाही कुंभार यांनी व्यक्त केली आहे.

दरम्यान, राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी या जाहिरातींवर मोठा दावा केला आहे. महायुती सरकारमधील मित्रपक्षातील एका मंत्र्यांनीच या निनावी जाहिराती दिल्याचा दावा त्यांनी केला आहे. शिवसेना उद्धव बाळासाहेब ठाकरे पक्षाचे खासदार संजय राऊत यांनीही या मुद्द्यावर टीकास्त्र सोडले होते.