Mahayuti Meeting at Varsha : 'इंडिया' आघाडीची बैठक होत असताना 'वर्षा'वरही महायुतीची खलबतं...; काय आहे प्रकरण?

Mumbai News : मुंबईत इंडिया आघाडीच्या घटक पक्षांची बैठक होत असतानाच दुसरीकडे राज्यातील महायुतीच्या घटक पक्षांचीही गुरुवारी रात्री बैठक पार पडली. मुख्यमंत्री एकनाथ शिंदे यांच्या शासकीय निवासस्थानी वर्षावर ही बैठक पार पडली. आगामी २०२४ च्या लोकसभा निवडणुकीत महाराष्ट्रातील सर्व जागा जिंकून केंद्रात पुन्हा एकदा मोदी सरकार आणायचे, असा ठराव संमत करण्यात आला.

यासोबत आणखी तीन ठरावही पारित करण्यात आले. यात पहिला म्हणजे, भारतीय अंतराळ संशोधन संस्था 'इस्त्रो'च्या सर्व शास्त्रज्ञांचे चांद्रयान मोहिमेबद्दल अभिनंदन करण्यात आले. दुसरे म्हणजे, आगामी काळात होणाऱ्या निवडणुका जिंकण्याचा निर्धार करण्यात आला. विशेष म्हणजे महायुतीतील ऐक्य टिकवून विजय संपादन करण्यासाठी सर्वच घटक पक्षांपुढे संघटितपणे काम करण्याचेही आव्हान आहे. तिसरा जपानच्या कोयासन विद्यापीठाने मानद डॉक्टरेट जाहीर केल्याबद्दल यावेळी उपमुख्यमंत्री देवेंद्र फडणवीस यांचा सत्कार करण्यात आला.

राज्यात महाविकास आघाडी सरकारच्या काळात राज्याच्या विकासात मोठी घसरण झाली. ही थांबवून थांबवून महायुती सरकारने आता सर्वच क्षेत्रात मोठी प्रगती केली आहे. राज्यात सर्वाधिक गुंतवणूक, सर्व पायाभूत सुविधा प्रकल्पांची वाढ होत आहे. याबद्दल महायुतीच्या सर्व घटक पक्षांनी मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांचे अभिनंदन केले.

२०२४ च्या लोकसभा निवडणुकीत महाराष्ट्रातील सर्व जागा जिंकून केंद्रात पंतप्रधान नरेंद्र मोदी यांच्या नेतृत्वात बहुमताचे सरकार स्थापन करण्यासाठी सर्व पक्षांचे नेते, कार्यकर्ते स्वतःला संकल्पबद्ध करीत आहेत, असेही या ठरावात सांगण्यात आले. पंतप्रधान नरेंद्र मोदी यांच्या विजयासाठी आम्ही कटिबद्ध आहोत, असा संकल्पही यावेळी करण्यात आला. तसेच, यावेळी केंद्रीय मंत्री रामदास आठवले, महादेव जानकर, जोगेंद्र कवाडे यांनीदेखील आपापल्या भूमिका मांडल्या.