Nagpur NCP : आता उमेदवारांनी स्ट्रॉंगरुम समोर झोपायचे का? सुरक्षा धोक्यात, पवारांच्या राष्ट्रवादीची तक्रार

नागपूर : नगरपालिका आणि नगर परिषदेसाठी दोन ऑक्टोबरला मतदान झाले. कोर्टाच्या आदेशामुळे सर्व मतमोजणी २१ डिसेंबरला केली जाणार आहे. त्यामुळे निकालासाठी सुमारे अडीच आठवडे प्रतीक्षा करावी लागणार आहे. या दरम्यान ईव्हीएम बदलल्या जातील, त्यात छेडछाड केली जाईल अशी भीती व्यक्त केली जात आहे.

शरद पवार यांच्या राष्ट्रवादी काँग्रेसचे युवा नेते सलील देशमुख यांनी मोवाड नगर परिषदेच्या स्ट्रॉंग रूम सुरक्षित नसल्याची तक्रार त्यांनी संबंधित यंत्रणेकडे केली असून निकाल पारदर्शक लागतील की नाही याबबत शंका व्यक्त केली आहे. गावागावांमध्ये अशीच स्थिती असून आता उमेदवारांनाच स्ट्रॉंगरुम समोर झोपून सुरक्षा करावी लागत असल्याचे त्यांनी सांगितले.

सलील देशमुख म्हणाले, मोवाड नगर परिषदेच्या निवडणुकीच्या ईव्हीएम एका स्ट्रॉंगरुममध्ये ठेवण्यात आल्या आहेत. रूमच्या प्रवेशदाराला सील लावण्यात आले आहे. मात्र रूमच्या खिडक्यांना लोखंडी जाळ्या नाहीत. त्या फक्त आतून सील करण्यात आल्या आहेत. त्या तोडून कोणीही आत जाऊ शकते. या स्ट्रॉंग रूम समोरचे सीसीटीव्हीची यंत्रणासुद्धा सुरक्षित ठिकाणी ठेवण्यात आली नाही.

ती कोणाच्याही सहज नजरेस पडते. डेटा बॅकअपही कोणीही चोरून नेऊ शकते इतकी कमकुवत यंत्रणा येथे आहे. आम्ही याची तक्रार संबंधित अधिकारी यांच्याकडे केली आहे. त्यांनीसुद्धा त्यात त्रुटी असल्याचे कबूल केले आहे. गावागावामध्ये हीच स्थिती आहे. निवडणूक आयोगाला याची कल्पना नाही आणि फिकीरही दिसत नाही. प्रत्येक उमदेवारालाही ईव्हीएममध्ये छेडछाड होईल याची भीती आहे. त्यामुळे उमेदवारांनाच स्ट्रॉंग रुमवर लक्ष ठेवावे लागत असल्याचे सलील देशमुख यांनी सांगितले.

नगरपालिका आणि नगर परिषदेची निवडणूक जाहीर झाल्यानंतर मतदानाच्या एक दिवस आधी काही परिषदांची निवडणूक पुढे ढकलण्यात आली आहे. ती आता 20 डिसेंबरला होणार आहे. त्यानंतर 21 डिसेंबरला सर्वच पालिकांची एकावेळी मतमोजणी केली जाणार आहे. त्यामुळे आधी निवडणुका झालेल्या स्थानिक स्वराज्य संस्थांना निकालासाठी अडीच आठवडे प्रतीक्षा करावी लागणार आहे.