Ajit Pawar NCP Nagpur : फक्त एक नगरसेवक अन् पक्षाचे दोन तुकडे; महापालिकेत राष्ट्रवादी काँग्रेस किती जोर मारणार?

Ajit Pawar NCP Mumbai meeting : शरद पवार आणि अजित पवार एकत्र, असताना नागपूर महापालिकेच्या निवडणुकीत राष्ट्रवादी काँग्रेसचा एकच नगरसेवक निवडून आला होता. आता पक्षाचे दोन तुकडे झाले आहेत.

काँग्रेस सोबत नाही आणि भाजप जागा सोडायला तयार नाही. अशा परिस्थिती स्वबळावर लढल्यास राष्ट्रवादी कितपत जोर मारेल, याची चर्चा सुरू आहे. विशेष म्हणजे शुक्रवारी मुंबईत झालेल्या पक्षाच्या बैठकीत नगरपालिका आणि नगर पंचायतीच्या निवडणुकीत आपल्याला स्वबळावरच लढायचे आहे, अशा स्पष्ट सूचना देण्यात आल्या.

महापालिकेची निवडणूक जाहीर होईल, तेव्हा त्या वेळची परिस्थिती बघून निर्णय घेतला जाईल, असे सर्वांना कळवण्यात आले. नागपूर महापालिकेच्या निवडणुकीत आघाडी होण्याची शक्यता कोणालाच दिसत नाही. काल मुंबई इथं अजित पवार (Ajit Pawar) यांच्या उपस्थितीत झालेल्या बैठकीतही आपापली तयारी करण्याच्या सूचना सर्वांना देण्यात आल्या आहेत.

महायुती (Mahayuti) झाली तर, ठीक नाही झाली तरी, आपण लढायचे असेही सर्वानुमते ठरवण्यात आले आहे. राष्ट्रवादी काँग्रेसचे राष्ट्रीय कार्याध्यक्ष येत्या दोन ते तीन दिवसात विदर्भातील सर्व स्थानिक स्वराज्य संस्थांच्या निवडणुकीचा आढावा घेणार आहेत. त्यानंतर एक निवड समिती स्थापन करणार आहे. या समितीच्या माध्यमातून भाजपसोबत वाटाघाटी केल्या जाणार आहेत. त्या यशस्वी झाल्या नाहीतर उमेदवारांच्या चाचपणी केली जाणार आहे.

तत्पूर्वी पक्षाचे राष्ट्रीय अजित पवार आणि प्रदेशाध्यक्ष सुनील तटकरे यांनी नगर पालिका आणि नगर पंचायतीच्या निवडणुकीची घोषणा झाली असल्याने आता युतीची शक्यता नाही. त्यामुळे या दोन्ही निवडणुकीत प्रत्येक जिल्ह्याला स्वबळावरच लढायची आहे, असे थेट सांगण्यात आली.

महापालिकेची निवडणूक जानेवारी महिन्यात होण्याची शक्यता आहे. त्यासाठी थोडा वेळ मिळणार आहे. त्यावेळी जी परिस्थिती राहील त्यानुसार महायुतीचा निर्णय घेण्यात येईल. त्यापूर्वी तुम्ही संघटना मजबूत करा आणि आपले सक्षम उमेदवार शोधून ठेवा अशी स्पष्ट सूचना राष्ट्रवादी काँग्रेसच्या पदाधिकाऱ्यांना देण्यात आली. या बैठकीसाठी सर्व जिल्ह्याचे अध्यक्ष, कार्याध्यक्ष, प्रदेश प्रतिनिधी, वेगवेगळ्या सेलच्या अध्यक्षांना मुंबईला बोलावण्यात आले होते.