IAS Transfer: फडणवीस सरकारकडून प्रशासनात पुन्हा मोठे फेरबदल; नाशिक, जळगाव, रत्नागिरीसह 'या' शहरातील 7 अधिकाऱ्यांच्या बदल्या

Mumbai News: देवेंद्र फडणवीसांच्या नेतृत्वातील महायुती सरकार पुन्हा एकदा महाराष्ट्रात सत्तेत परतल्यानंतर प्रशासकीय पातळीवर मोठी उलथापालथ सुरू आहे.गेल्या नऊ ते दहा महिन्यांपासून राज्यात वरिष्ठ आयपीएस आणि आयएएस अधिकाऱ्यांच्या बदल्यांचा धडाकाच लावला आहे. याचदरम्यान, आता राज्य सरकारनं सात वरिष्ठ आयएएस अधिकाऱ्यांच्या बदल्या (IAS Transfer) केल्या आहे.

राज्य सरकारकडून सात वरिष्ठ आयएएस अधिकाऱ्यांच्या बदल्यांचा आदेश मंगळवारी (ता.7 ऑक्टोबर) काढले आहेत. नाशिक,जळगाव,रत्नागिरीसह पुणे जिल्ह्यांतील अधिकाऱ्यांच्या मोठे फेरबदल करण्यात आले आहेत.

कोकणातील रत्नागिरीचे जिल्हाधिकारी देवेंद्र सिंह यांची महाराष्ट्र प्रदूषण नियंत्रण मंडळाचे सदस्य सचिव म्हणून बदली करण्यात आली आहे. पिंपरी-चिंचवड महानगरपालिकेचे आयुक्त शेखर सिंह यांच्याकडे नाशिक कुंभमेळा आयुक्तपदाची जबाबदारी सोपवण्यात आली आहे.

वरिष्ठ आयएएस अधिकारी संजय कोलटे यांची पुणे (Pune) साखर आयुक्तपदी बदली करण्यात आली आहे. त्यांच्याकडे यापूर्वी शिवशाही पुनर्वसन प्रकल्पाचे व्यवस्थापकीय संचालकपदाची जबाबदारी होती. नाशिकचे जिल्हाधिकारी जलज शर्मा यांची नियुक्ती नाशिक महानगर प्रदेश विकास प्राधिकरण आयुक्त म्हणून नियुक्ती करण्यात आली आहे.

तसेच जळगावचे जिल्हाधिकारी आयुष प्रसाद यांची बदली नाशिकचे नवे जिल्हाधिकारी म्हणून करण्यात आली आहे. तर ठाणे जिल्हा परिषदेचे मुख्य कार्यकारी अधिकारी असलेल्या रोहन घुगे यांच्याकडे जळगाव जिल्हाधिकारी म्हणून बदली करण्यात आली आहे.

महाराष्ट्र राज्य रस्ते विकास महामंडळचे संयुक्त व्यवस्थापकीय संचालकपदी कार्यरत असलेल्या मनोज जिंदल यांची रत्नागिरी जिल्हाधिकारीपदी नियुक्ती करण्यात आली आहे.स्थानिक स्वराज्य संस्थांच्या निवडणुकांपूर्वी महाराष्ट्र राज्याच्या प्रशासन विभागात फेरबदल सुरू असल्याचे पाहायला मिळत आहे. त्यातही मंगळवारी रत्नागिरी, नाशिक, जळगाव, पुणे जिल्ह्यांतील प्रशासनात वरिष्ठ आयएएस अधिकाऱ्यांच्या बदल्या बदल्या करण्यात आला आहे.