New Labour Code: आता वाया जाणार नाहीत तुमच्या सुट्ट्या; नवीन कायद्यामुळे शिल्लक रजेचे दरवर्षी मिळणार पैसे

Leave encashment new labour law benefits employees: नवीन कामगार कायद्यामुळे (Labour Code 2025)कर्मचाऱ्यांसाठी गुडन्यूज आहे. नवीन कामगार कायद्यामुळे कामगारांच्या शिल्लक रजा आता वाया जाणार नाहीत. कर्मचाऱ्यांना दरवर्षी त्यांच्या अतिरिक्त रजेचे पैसे म्हणजेच लिव्ह एनकॅशमेंट मिळवता येतील.

रजेसाठी पात्र होण्याची मर्यादा 240 दिवसांवरून 180 दिवसांवर आणलीय. जर मालकानं रजा नाकारली, तर ती रद्द न होता पुढच्या वर्षीसाठी जोडली जाईल. 18 हजार रुपयांपेक्षा कमी पगार असलेल्या कामगारांना याचा प्रामुख्यानं फायदा होईल.

अर्जित रजेसाठी पात्र होण्याकरिता कर्मचाऱ्यांना आता जास्त काळ वाट पाहावी लागणार नाही. जुन्या कारखाना कायद्यानुसार 240 दिवस सलग काम करणे अनिवार्य होते. नवीन कामगार संहितेने ही मर्यादा केवळ 180 दिवसांपर्यंत (अंदाजे सहा महिने) कमी केली आहे. जर एखाद्या कर्मचाऱ्याने एका कॅलेंडर वर्षात सलग 180 दिवस सेवा केली असेल, तर तो पगारी रजेसाठी पात्र आहे.

नवा कायदा काय आहे?

1. शिल्लक रजेसाठी निवृत्तीची वाट पाहायला नको, दरवर्षी पैसे मिळणार

2. रजेसाठी पात्र होण्यासाठी 240 ऐवजी केवळ 180 दिवस काम करणे आता पुरेसं आहे.

3. रजा नाकारल्यास ती वाया जाणार नाही तर पुढील वर्षींच्या रजेत जोडली जाणार आहे.

4. कर्मचारी 30 दिवसांची रजा पुढील वर्षांसाठी साठवून ठेवू शकतात.

5. १८ हजार रुपयांपेक्षा कमी पगार असलेल्या कामगारांना याचा लाभ मिळणार आहे.

कुणाला फायदा होईल?

• नवीन कामगार संहिता ही प्रामुख्याने अशा कामगारांसाठी तयार केले आहे जे शारीरिक, अकुशल, कुशल, तांत्रिक, परिचालन किंवा लिपिकीय कामे करतात आणि ज्यांचा मासिक पगार ₹18,000 पेक्षा कमी आहे.

• जर एखादा कर्मचारी दरमहा ₹18,000 पेक्षा जास्त कमावणारा पर्यवेक्षक असेल, किंवा व्यवस्थापकीय किंवा प्रशासकीय पदावर असेल, तर त्यांना या संहितेअंतर्गत हे विशिष्ट फायदे मिळणार नाहीत.

• अनेक राज्यांनी अद्याप या नवीन कामगार संहिता अधिसूचित केलेल्या नाहीत. त्यामुळे, जोपर्यंत तुमच्या राज्यात त्यांची अंमलबजावणी होत नाही, तोपर्यंत तुमची कंपनी जुन्या नियमांनुसार कार्यरत राहू शकते.