मुंबई : अमली पदार्थ प्रतिबंधक विभागाचे (NCB) विभागीय संचालक समीर वानखेडे (Sameer Wankhede) हे आता राज्य उत्पादन शुल्क विभागाच्या (State Excise Department) रडारवर आले आहेत. मुंबईत वानखेडे यांचा एक रेस्ट्रो बार आहे. वानखेडे यांनी 17 वर्षांचे असताना या बारचा परवाना घेतला होता. या प्रकरणी उत्पादन शुल्क विभागाने ठाण्याचे जिल्हाधिकारी आणि ठाण्याचे उत्पादन शुल्क अधीक्षक यांना कारवाई करण्याचे निर्देश दिले होते. आता ठाण्याच्या जिल्हाधिकाऱ्यांनी कारवाई पाऊल उचलल्यानंतर ठाण्याचा उत्पादन शुल्क अधीक्षकांनीही कारवाईचा बडगा उगारला आहे.
ठाण्याचे उत्पादन शुल्क अधीक्षक निलेश सांगडे यांनी वानखेडे यांना कारणे दाखवा नोटीस बजावली आहे. खोटी माहिती सादर केल्याप्रकरणी त्यांच्या बारचा परवाना रद्द का करू नये, अशी विचारणा त्यांनी केली आहे. त्यांना उत्तर देण्यासाठी 15 दिवसांचा अवधी देण्यात आला आहे. त्यांचे उत्तर आल्यानंतर पुढील कारवाई होणार आहे. वानखेडे यांनी बारचा परवाना मिळवला होता त्यावेळी ते वयानुसार तो मिळवण्यास पात्र होते, हे त्यांना आता सिद्ध करावे लागणार आहे.
ठाण्याचे जिल्हाधिकारी राजेश नार्वेकर (Rajesh Narvekar) हे आहेत. शिवसेनेचे खासदार संजय राऊत (Sanjay Raut) यांचे व्याही आहेत. आता योगायोगाने वानखेडेंवर कारवाई करण्याची जबाबदारीही नार्वेकर यांच्यावर आली आहे. वानखेडे यांनी सतराव्या वर्षी बार परवाना घेतल्याने या बारला जिल्हाधिकारी नार्वेकर यांनी कारणे दाखवा नोटीस बजावली आहे. त्यांनी 1997 मध्ये बारचा परवाना घेताना खोटी कागदपत्रे सादर केल्याचे या नोटिशीत म्हटले आहे. यामुळे वानखेडेंच्या अडचणीत वाढ झाली आहे.
नवी मुंबईत सद्गुरू नावाने हा रेस्ट्रो बार आहे. समीर वानखेडे यांचे वडील उत्पादन शुल्क विभागात होते. वाशी येथे 1997-98 मध्ये सद्गुरू रेस्ट्रो बार सुरू करण्यात आला. त्याचा परवाना 27 ऑक्टोबर 1997 रोजी समीर वानखेडे यांच्या नावाने घेण्यात आला. त्यावेळी वानखेडे यांचे वय 17 वर्षे 10 महिने होते. हा परवाना 2022 पर्यंत वानखेडे यांच्या नावावर आहे. बारचा परवाना मिळवण्यासाठी वयाची अट 21 वर्षे आहे. राज्य उत्पादन शुल्क विभागाने ठाण्याचे जिल्हाधिकारी आणि उत्पादन शुल्क अधीक्षक यांच्याकडे हे नेमके कसे घडले याविषयी विचारणा केली होती.
उत्पादन शुल्क विभागाची प्राथमिक चौकशी संपली असून, या प्रकरणी ठाण्याचे जिल्हाधिकारी आणि ठाण्याचे उत्पादन शुल्क अधीक्षक यांना कारवाईचे निर्देश देण्यात आले आहेत. यानुसार, वानखेडे यांनी 17 व्या वर्षी बारचा परवाना मिळवला. त्यांच्यावर महाराष्ट्र प्रतिबंध कायद्याच्या कलम 54 नुसार कारवाई होऊ शकते. त्यांचा परवाना रद्द केला जाऊ शकतो. यासाठी वानखेडे यांना परवाना घेताना योग्य कागदपत्रे सादर केली हे सिद्ध करावे लागेल, अशी माहिती सूत्रांनी दिली.
सरकारनामाचे सदस्य व्हा
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.