Aba Bagul vs Mahesh Wable : हायहोल्टज लढतीत आबा बागुलांना विक्रमाची संधी! भाजपनेही दिला तगडा उमेदवार! सहकारनगर-पद्मावतीत कोणाची हवा?

Pune News : पुणे महानगरपालिका निवडणुकीच्या रिंगणात अनेक प्रभागांमध्ये माजी नगरसेवक आमने-सामने आले आहेत. यात प्रभाग क्रमांक ३६ हा विशेष लक्षवेधक ठरला आहे. येथे भाजप उमेदवारचे महेश वाबळे आणि उपमुख्यमंत्री एकनाथ शिंदेच्या शिवसेनेचे उमेदवार आबा बागुल यांच्यात थेट लढत होणार आहे.

आबा बागुल हे सलग सातव्यांदा महापालिकेची निवडणूक लढत असून आतापर्यंत सहा वेळा ते निवडून आले आहेत. सलग सातव्यांदा विजय मिळवत अनोखा विक्रम आपल्या नावावकर करण्याची संधी त्यांना आहे. तर, वाबळे यांची ही सलग दुसरी निवडणूक आहे. त्यामुळे सहकारनगर-पद्मावती प्रभागात कोणाची हवा याचा फैसला 16 जानेवारीला लागणार आहे.

आबा बागुल हे यापूर्वी काँग्रेसमध्ये होते. मात्र डिसेंबर २०२५ मध्ये त्यांनी एकनाथ शिंदे यांच्या शिवसेनेत प्रवेश केला. दुसरीकडे, महेश वाबळे यांनी याच प्रभागातून 2017 मध्ये विजय संपादन केला होता. प्रभाग क्रमांक 36 हा पर्वती विधानसभा मतदारसंघात येतो आणि हा मतदारसंघ भाजपचा गड मानला जातो. लोकसभा, विधानसभा निवडणुकीमध्ये या ठिकाणी भाजपला मोठं मताधिक्य मिळालं होतं.

मात्र महापालिका निवडणुकीमध्ये या ठिकाणी व्यक्ति केंद्रित राजकारण होत असल्याचं देखील मागील काही निवडणुकीत दिसून आले आहे. याच प्रभागातून विविध पक्षाचे दिग्गज नेते यापूर्वीही सभागृहात गेले आहेत. यामध्ये उपमुख्यमंत्री अजित पवार यांच्या राष्ट्रवादी काँग्रेसचे शहराध्यक्ष सुभाष जगताप आणि शरद पवारांच्या राष्ट्रवादी काँग्रेसच्या माजी स्थायी समिती अध्यक्ष अश्विनी कदम यांचा समावेश आहे. यंदाही हे नेते याच प्रभागातून निवडणूक रिंगणात आहेत.

उमेदवारांची वेगळी व्होट बँक

पक्षाच्या ताकदीसोबतच आबा बागुल, सुभाष जगताप आणि अश्विनी कदम यांची स्वतःची एक वेगळी वोट बँक या प्रभागात असल्याचे पाहायला मिळते. तर दुसरीकडे या प्रभागामध्ये भाजपाला मानणारा मोठा वर्ग आहे. त्यामुळे या प्रभागामध्ये पक्षीय पातळी बरोबर वैयक्तिक पातळीवर देखील या निवडणुका लढल्या जाणार आहेत.

पर्वती विधानसभा मतदारसंघातून अपक्ष म्हणून बागुल यांनी निवडणूक लढल्यानंतर ते काँग्रेस पासून दूरच राहिले. महापालिका निवडणुकीच्या पार्श्वभूमीवर त्यांचा भाजपमध्ये प्रवेश होणार असल्याच्या चर्चा रंगल्या. त्यांच्यासोबत हेमंत बागुल हे देखील प्रवेश करून प्रभाग क्रमांक 27 मधून निवडणूक लढणार असल्याचे सांगितले जात होतं. मात्र ऐनवेळी बागुल यांनी एकनाथ शिंदे यांच्या शिवसेनेमध्ये प्रवेश केला.

काटे की टक्कर होणार?

बागुल यांच्या शिवसेनेतील प्रवेशानंतर भाजपनेही त्यांच्यासमोर माजी नगरसेवक महेश वाबळे यांना उतरून तगडं अव्हान निर्माण केला आहे. त्यामुळे बागुल हे सलग सातव्यादा विजयी होऊन एक सीनियर नेता महापालिकेच्या सभागृहात जाणार की भाजप आपला गड राखत वाबळे विजय होणार हे पाहणं महत्त्वाचं ठरणार आहे.