Vaishnavi Hagawane Case : वैष्णवीच्या लग्नात फॉर्च्युनर गाडीची चावी देतानाच अजितदादांनी हगवणे कुटुंबाबद्दल उपस्थित केली होती शंका

Pune News : पुण्यातील राष्ट्रवादी काँग्रेस अजित पवार पक्षाचे मुळशीचे तालुकाध्यक्ष राजेंद्र हगवणे यांची सून वैष्णवी हगवणे हिने गळफास घेऊन आत्महत्या केल्याची धक्कादायक घटना काही दिवसांपूर्वी उघडकीस आली होती. या घटनेनंतर एकच खळबळ उडाली असून आता वैष्णवी हगवणेच्या कुटुंबियांनी सासरच्या मंडळींनी हुंड्यांसाठी मुलीचा छळ केल्याचा गंभीर आरोप केला आहे.

वैष्णवीच्या वडिलांनी राजेंद्र हगवणे यांच्या मुलाला लग्नात हुंडा म्हणून 51 तोळे सोने,7.5 किलो चांदीची ताटे आणि फॉर्च्युनर कार दिली होती.या फॉर्च्युनर कारबाबत उपमुख्यमंत्री अजित पवारांनी लग्नातच शंका उपस्थित केली होती.

वैष्णवी हगवणेच्या वडिलांनी याप्रकरणी पोलीस ठाण्यात गुन्हा दाखल केला आहे.यावेळी दिलेल्या एफआयआरमध्ये वैष्णवी आणि शशांक हगवणे यांच्या 'सनीज वर्ल्ड' येथे झालेल्या लग्नाला राष्ट्रवादी काँग्रेसचे सर्वेसर्वा अजित पवारही उपस्थित होते.

यावेळी उपमुख्यमंत्री अजित पवार यांच्याच हस्ते वैष्णवीच्या वडिलांतर्फे शुभम हगवणे यांना फॉर्च्युनरची चावी देण्यात आली होती, तो फोटोही आता समोर आला आहे. त्यावेळी अजित पवार यांनी हुंड्यात देण्यात आलेल्या फॉर्च्युनर गाडीविषयी हगवणे यांना खोचक टिप्पणी केल्याचेही वैष्णवीच्या वडिलांनी सांगितलं आहे.

याविषयी वैष्णवीचे वडील म्हणाले,अजित पवार वैष्णवी-शशांकच्या लग्नाला आले होते.ते सुमारे अर्धा ते पाऊण तास विवाहस्थळी थांबले होते. ते वधू-वरांना आशीर्वाद द्यायला आले होते. त्यावेळी त्यांनी लग्नात हुंडा म्हणून देण्यात आलेल्या फॉर्च्युनर या आलिशान कारकडे पाहून राजेंद्र हगवणे यांना ही गाडी तुम्ही हुंड्यात मागितली आहे की त्यांनी दिली आहे, असा सवाल केला होता. अजितदादांनी राजेंद्र हगवणेंना विचारलेल्या प्रश्नामुळे सगळेच हसले. अजित पवार यांनी खोचकपणे तो प्रश्न हगवणेंना विचारल्याचंही वैष्णवीच्या वडिलांनी सांगितले.

पुणे पोलिसांनी आता राजेंद्र हगवणे यांच्या मुळशीतील घरी दाखल होत ही फॉर्च्युनर गाडी जप्त केली आहे. या गाडीचा नंबर एमएच 14 केयू 2002 असा आहे.वैष्णवीच्या वडिलांनी हुंड्यात दिलेली फॉर्च्युनर आणि ऍक्टिव्हा गाडी जप्त केली आहे. याप्रकरणी दाखल करण्यात आलेल्या एफआयआरमध्ये वैष्णवीच्या वडिलांनी राजेंद्र हगवणे यांच्या मुलाला लग्नात हुंडा म्हणून 51 तोळे सोने,7.5 किलो वजनाचे चांदीची ताटे आणि फॉर्च्युनर कार दिल्याचं म्हटलं आहे.

वैष्णवीने गळफास घेऊन आत्महत्या केली,मात्र ही आत्महत्या नसून हत्या असल्याचा आरोप तिच्या पालकांनी केला आहे. आमच्या मुलीचा छळ झाल्यानेच तिने हे टोकाचं पाऊल उचलल्याचा आरोप वैष्णवीच्या वडिलांनी केला आहे. राजेंद्र हगवणे यांच्यासह त्यांचा मुलगा शुभम हाही सध्या फरार असून पोलीस आरोपींचा शोध घेत आहेत.