Ajit Pawar: पार्थ पवारांना घ्यायचाय अजितदादांच्या दुर्मिळ फोटोंचा शोध : जयंतीनिमित्त घोषित केली स्पर्धा, तब्बल अडीच लाखांची बक्षिसे

Photo Competition: राष्ट्रवादी काँग्रेस पक्षाचे नेते आणि दिवंगत उपमुख्यमंत्री अजित पवार यांच्या सार्वजनिक आणि राजकीय प्रवासातील दुर्मिळ क्षणांना उजळा देण्यासाठी पार्थ पवार फाउंडेशनच्या वतीने एका मोठ्या उपक्रमाची घोषणा करण्यात आली आहे. अजितदादांच्या जयंतीनिमित्त राज्यस्तरीय दुर्मिळ फोटो, व्हिडिओ आणि रील्स स्पर्धेचे आयोजन करण्यात आले असून, यात तब्बल २.५० लाखांहून अधिक रकमेची बक्षिसे दिली जाणार आहेत.

अजित पवारांचा महाराष्ट्रातील दांडगा जनसंपर्क, प्रशासनावरील पकड आणि कार्यकर्त्यांशी असलेले जिव्हाळ्याचे संबंध सर्वश्रुत आहेत. या प्रवासात राज्यातील सामान्य नागरिक, कार्यकर्ते आणि फोटोग्राफर्सच्या कॅमेऱ्यात कैद झालेले दादांचे अप्रकाशित व दुर्मिळ क्षण पुन्हा एकदा लोकांसमोर आणणे आणि ते जतन करणे, हा या स्पर्धेमागचा मुख्य हेतू आहे. पार्थ पवार यांनी या डिजिटल स्पर्धेच्या माध्यमातून तरुणाई आणि कार्यकर्त्यांशी संवाद साधण्याची राजकीय आणि सामाजिक नाडी पकडल्याचे दिसते.

बक्षिसांचा धडाका

स्पर्धकांना आकर्षित करण्यासाठी फाउंडेशनने बक्षिसांचा मोठा खजिना खुला केला आहे. राज्यस्तरीय फोटो स्पर्धेमध्ये प्रथम क्रमांकास ७५ हजार रूपये, द्वितीय क्रमांकास ५० हजार रूपये आणि तृतीय क्रमांकास २५,हजार रूपयांचे पारितोषिक देण्यात येणार आहे. तर राज्यस्तरीय व्हिडिओ व रील्स स्पर्धेसाठी प्रथम क्रमांकास १ लाख रूपये, द्वितीय क्रमांकास ७५ हजार रूपये आणि तृतीय क्रमांकास ५० हजार रूपयांची भरघोस रक्कम जाहीर करण्यात आली आहे. याशिवाय स्थानिक पातळीवरील कलागुणांना वाव देण्यासाठी प्रत्येक जिल्ह्यातील सर्वोत्तम फोटोसाठी ५ हजार रूपये आणि सर्वोत्तम व्हिडिओ किंवा रीलसाठी २५ हजार रूपयांची स्वतंत्र पारितोषिके दिली जाणार आहेत.

स्कॅन करा अन् सहभागी व्हा!

या स्पर्धेत सहभागी होण्यासाठी आयोजकांनी प्रसिद्ध केलेल्या अधिकृत पोस्टरवरील QR Code स्कॅन करून आपले फोटो आणि व्हिडिओ अपलोड करायचे आहेत. महाराष्ट्रातील जास्तीत जास्त नागरिकांनी, तरुणांनी आणि छायाचित्रकारांनी आपल्या संग्रहातील अजितदादांच्या आठवणींचे अमूल्य क्षण या मोहिमेत शेअर करावेत, असे आवाहन पार्थ पवार फाउंडेशनकडून करण्यात आले आहे.