Ajit Pawar: माझ्या जीवावर मिरवायचं थांबवा, पद काढून घेईन; पक्षाच्या कामावर अजितदादांची उघड नाराजी

"आठवड्यातून एकदा बारामतीत आलो की लोकांच्या निवेदनाचा पाऊस माझ्यावर पडतो. वास्तविक येथील पदाधिकाऱ्यांनी लोकांमध्ये जाऊन त्यांच्या अडीअडचणी सोडविल्या पाहिजेत. येथे माझे काही अधिकारी मदतीला दिले आहेत, असे असतानाही पक्ष संघटनेचे काम पुढे जात नाही, याचे आश्चर्य वाटते," अशी खंत अजितदादांनी व्यक्त केली. पवार साहेबांचा सुरवातीला एक काळ होता. त्यांच्या पदाचा आणि त्यांच्या संस्काराचा वारसा जतन करत आपण बारामतीचा विकास सुरू ठेवला, असे पवार म्हणाले.

"आगामी काळातील स्थानिक स्वराज्य संस्थांच्या पंचवार्षिक निवडणुका पक्षाने गांर्भि‍याने घेतल्या आहेत. निवडणुकींना सामोरे जाताना कोण जवळचा आणि कोण लांबचा कार्यकर्ता आहे, असा भेद भाव ठेवू नये. पदाधिकाऱ्यांनी तालुका व शहर स्तरावर बैठका सुरू कराव्यात, अशा सूचना अजितदादांनी पदाधिकाऱ्यांना दिला.

अजितदादा म्हणाले, " जिल्हा परिषद, पंचायत समित्यांसह नगरपालिका, नगरपंचायतीच्या पंचवार्षिक निवडणूका तोंडावर आल्या आहेत. परंतु बारामतीत अपेक्षित पक्ष संघटनेचे काम होताना दिसत नाही. ५ आॅक्टोंबरपर्यंत बुथ कमट्यांपासून सर्वकाही संघटनेची कामे पुर्ण करा. गाव व शहर निहाय कार्यकर्त्यांच्या बैठका घ्या. त्याचा अहवाल मला द्या. हे काम जमत नसेल तर संबंधितांनी माझ्या जीवावर लोकांमध्ये मिरवण्याचे थांबवा,"

काय म्हणाले अजित पवार ....

३५ वर्षांपासून मी बारामतीचा कारभार जनतेच्या आशीर्वादाने बघत आहे. आपल्याकडे उपमुख्यमंत्री, पालकमंत्री, वित्त मंत्रीपद आहे. त्याचा लोकांना अधिकाधिक फायदा व्हावा, यासाठी मी जीवाचे रान करीत आहे. तालुक्यात शिक्षण, आरोग्य, रस्ते, पाण्याच्या सुविधा आणि शेतकऱ्यांना सरकारच्या विविध योजनांचा फायदा होताना दिसत आहे. लवकरच बारामतीच्या जीरायती भागासाठी कऱ्हा व नीरा नदी जोड प्रकल्पाचे टेंडर निघणार आहे. त्याचाही फायदा तेथील शेतकऱ्यांना करून देण्यासाठी मी कटिबद्ध आहे.