Baramati By-Election : बारामतीमध्ये पोटनिवडणूक जाहीर होताच रोहित पवारांची सोशल मीडियावर पोस्ट, 'वास्तव हे कल्पनेपेक्षाही भयंकर...'

Rohit Pawar News : निवडणूक आयोगाने आज पाच राज्यातील विधानसभा निवडणुकांसोबत महाराष्ट्रातील बारामती आणि राहुरी मतदारसंघात पोटनिवडणूक जाहीर केली आहे. उपमुख्यमंत्री अजित पवार यांच्या अपघाती निधनाने बारामतीमध्ये पोटनिवडणूक होणार आहे. पोटनिवडणूक जाहीर होताच आमदार रोहित पवार यांनी सोशल मीडियावर भावूक पोस्ट केली.

ते म्हणाले, 'ज्या निवडणुकीत फक्त मताधिक्याचीच चर्चा व्हायची त्या बारामती मतदारसंघात कधी पोटनिवडणूक घ्यावी लागेल, असं कुणाला स्वप्नातही कधी वाटलं नाही.. पण दुर्दैवाने अजितदादा आपल्यातून गेले आणि आज बारामती विधानसभा मतदारसंघासाठी पोटनिवडणूक जाहीर झाली..कधी कधी वास्तव हे कल्पनेपेक्षाही अधिक भयंकर असतं...'

राहुरी मतदारसंघाचे आमदार शिवाजी भानुदास कर्डिले आणि बारामती मतदारसंघाचे आमदार अजित अनंतराव पवार यांच्या निधनामुळे या जागा रिक्त झाल्या असून त्यासाठी ही पोटनिवडणूक घेतली जाणार आहे.

निवडणूक कार्यक्रम जाहीर होताच राहुरी आणि बारामती मतदारसंघात आचारसंहिता तत्काळ लागू झाली आहे. तसेच गुन्हेगारी पार्श्वभूमी असलेल्या उमेदवारांची माहिती उमेदवार आणि राजकीय पक्षांनी प्रचार काळात तीन वेळा प्रसिद्ध करणे बंधनकारक असल्याचेही आयोगाने स्पष्ट केले आहे.पोटनिवडणुकीसाठी मतदान 23 एप्रिलला होणार असून मतमोजणी 4 मे 2026 रोजी केली जाणार आहे.

23 एप्रिलला मतदान

आयोगाने जाहीर कार्यक्रमानुसार 30 मार्च 2026 (सोमवार) रोजी निवडणुकीसाठी राजपत्र अधिसूचना जारी केली जाईल. उमेदवारी अर्ज दाखल करण्याची अंतिम तारीख 6 एप्रिल 2026 (सोमवार) निश्चित करण्यात आली आहे. दाखल झालेल्या अर्जांची छाननी 7 एप्रिल 2026 (मंगळवार) रोजी होणार आहे.उमेदवारी अर्ज मागे घेण्याची अंतिम तारीख 9 एप्रिल 2026 (गुरुवार) आहे. त्यानंतर संबंधित मतदारसंघांमध्ये 23 एप्रिल 2026 (गुरुवार) रोजी मतदान पार पडेल. तर, 4 मे 2026 (सोमवार) रोजी मतमोजणी होऊन निकाल जाहीर केला जाईल. तर संपूर्ण निवडणूक प्रक्रिया 6 मे 2026 (बुधवार) पर्यंत पूर्ण केली जाणार असल्याचे आयोगाने स्पष्ट केले आहे.