Loksabha Election : 'एकही शब्द वाईट बोलले नाही...' सुनेत्रा पवारांचा रोख कुणाकडे?

Loksabha Election : बारामती लोकसभा मतदारसंघातून शक्तिप्रदर्शन करत सुनेत्र पवार यांचा उमेदवारी अर्ज दाखल केला. बारामतीच्या निवडणुकीकडे राज्याचे लक्ष लागले आहे. महायुतीच्या नेत्यांच्या उपस्थितीत उमेदवारी अर्ज भरल्यानंतर फेसबुकवर पोस्ट करत सुनेत्रा पवारांनी आपल्याला विजयाची खात्री असल्याचे म्हटले आहे. शिवाय कितीही हल्ला केला तरी विचलित होणार नाही, असे आव्हान नाव न घेता सुप्रिया सुळे यांना दिले.

'या महासभेने एक सिद्ध केलं. ते म्हणजे कोणी कितीही हल्ला केला तरी मी विचलित होणार नाही. एकही शब्द आजपर्यंत वाईट बोलले नाही आणि यापुढेही बोलणार नाही. मी विकासाचा कार्यक्रम घेऊनच जनतेसमोर गेले आणि यापुढेही जाईन,' असे सुनेत्रा पवार यांनी आपल्या फेसबुक पोस्टमध्ये म्हटले आहे.

'उमेदवारी अर्ज दाखल करण्यापूर्वी पार पडलेल्या या महासभेने मला बारामती लोकसभा मतदारसंघातील महायुतीच्या विजयाचा विश्वास अधिकच भक्कम केला, बळकट केला, असा विश्वास सुनेत्रा पवार यांनी व्यक्त केला.

महायुतीचे शक्तिप्रदर्शन

सुनेत्रा पवार यांनी मुख्यमंत्री एकनाथ शिंदे, उपमुख्यमंत्री देवेंद्र फडणवीस, केंद्रीय मंत्री रामदास आठवले आणि राष्ट्रवादीचे नेते प्रफुल्ल पटेल, विधान परिषदेच्या उपसभापती नीलम गोरे, उच्च व तंत्र शिक्षण मंत्री चंद्रकांत पाटील, हर्षवर्धन पाटील, विजय शिवतारे यांच्या उपस्थितीमध्ये अर्ज दाखल केला. त्या पूर्वी जाहीर सभा घेत महायुतीने शक्तिप्रदर्शन केले.

R