BJP Politics : भाजपमध्ये अस्वस्थता! पक्ष निष्ठावंतांचा की आयात उमेदवारांचा? महापालिका निवडणुकीच्या रणनीतीमुळे चिंता वाढली

BJP News : अनेक वर्ष भाजप हा सत्तेचा बाहेर राहिलेला पक्ष. अटबिहारी वाजपेयी पंतप्रधान झाले तरी पक्षाचा हवा तसा विस्तार झाला नव्हता. 2014 ला नरेंद्र मोदी पंतप्रधान झाले आणि त्यानंतर गाव पातळी ते राष्ट्र पातळीवर भाजप बलाढ्या पक्ष म्हणून समोर आला. मात्र, जेव्हा भाजप सत्तेत नव्हता तेव्हा पक्ष वाढीसाठी कष्ट करणाऱ्या आणि संकट काळात पक्षाच्या सोबत राहणाऱ्या निष्ठावान कार्यकर्त्यांमध्ये अस्वस्थता आहे.

आगामी महापालिकेच्या पार्श्वभूमीवर पुण्यात विविध पक्षातून भाजपमध्ये इन्कमिंग होणार आहे. या इन्कमिंगमुळे पुणे भाजपच्या कोअर कमिटीमध्ये खडाजंगी देखील झाली. वरिष्ठ नेते आपल्या सोयीसाठी राष्ट्रवादी काँग्रेस, राष्ट्रवादी काँग्रेस शरदचंद्र पवार पक्ष, दोन्ही शिवसेने यामधून काही जणांना भाजपमध्ये घेण्यास उत्सुक आहेत. मात्र, त्यांच्या या निर्णयामुळे वर्षानुवर्ष भाजपसोबत एकनिष्ठ असलेल्या कार्यकर्ते, पदाधिकाऱ्यांवर अन्याय होत असल्याचे चित्र आहे.

पुण्यासह वसई-विरार, कल्याण-डोंबिवली या मोठ्या महापालिकांमधील देखील हेच चित्र दिसून येत आहे. बहुजन विकास आघाडीचे एक हाती वर्चस्व होते. त्यावेळी पक्ष जिवंत ठेवण्यासाठी भाजपचे कार्यकर्ते झटत होते. मात्र, आता बविआमधून प्रस्तापित नेत्यांना भाजपमध्ये आणून निष्ठावंतावर अन्याय केला जात असल्याचे चर्चा आहे. पक्षाला आता अच्छे दिन आले आहेत त्यामुळे आधी निष्ठावंतांना तिकीट द्या मग बाहेरून आलेल्यांचा विचार करा, असा मत प्रवाह देखील पक्षात आहे.

पक्षनिष्ठेपेक्षा आर्थिक ताकद महत्त्वाची

भाजप हा कार्यकर्त्यांचा पक्ष म्हणून आत्तापर्यंत परिचित होता. मात्र, कार्यकर्ता हा पक्षाच्या केंद्रस्थानी होता. मात्र, निवडणुकीचे शास्त्र बदलल्यामुळे आर्थिकदृष्टा सक्षम असलेल्या कार्यकर्त्याला भाजपमध्ये महत्त्व असल्याची दबक्या आवाजात चर्चा आहे. महापालिका निवडणुकीत कोट्यावधींचा खर्च करण्याची तयारी असलेल्या आर्थिक ताकदवान उमेदवाराला प्राधान्य मिळत असून निष्ठावंत असाल आणि आर्थिक ताकद नसले तर तिकीट मिळण्याची शक्यता देखील कमी आहे, असे बोलले जात आहे.

आमदार समर्थकांसाठी लावतायेत ताकद

येणाऱ्या महापालिका आणि जिल्हा परिषद निवडणुकीमधून भाजप 2029 साठी स्वबळाची तयारी करत असल्याची चर्चा आहे. त्यामुळे ज्या प्रकारे विधानसभेच्या निवडणुकीनंतर विरोधी पक्षातील पराभूत झालेले ताकदवान उमेदवार भाजपने आपल्या पक्षात घेण्याचा सपाटा सुरू केला होता तसाच आता महापालिकेत देखील तशीच रणनीती आखली आहे. त्यामध्ये देखील महापालिकेतील विधानसभा मतदारसंघात आपले वर्चस्व ठेवण्यासाठी आमदार आपल्या समर्थक उमेदवारांसाठी ताकद लावत आहेत.

संघाची भूमिका महत्त्वाची

महापालिका निवडणुकीत होणाऱ्या इन्कमिंगबाबत राष्ट्रीय स्वंयसेवक संघाची भूमिका पुढे आली नाही. त्यामुळे या इन्कमिंगला अजुन तरी त्यांचा विरोध नसल्याची चर्चा आहे. संघाकडून स्वच्छ चारित्र्याच्या उमेदवारांसाठी आग्रह केला जातोय. काही ठिकाणी तरी इन्कमिंग करणारे उमेदवार हे संघाशी देखील जवळीक साधण्याचा प्रयत्न करत आहेत. मिळालेल्या माहितीनुसार, महापालिका निवडणुकीत उमेदवार निवडताना स्थानिक संघाच्या व्यक्तींचा सल्ला घ्या, अशी सूचना भाजपने वरिष्ठ पातळीवरून केली आहे.