Pune ZP : महापालिकेच्या रणधुमाळीतच अजितदादांची पुणे जिल्हा परिषदेसाठी फिल्डिंग; 3 शिलेदारांवर मोठी जबाबदारी

Pune News : सध्या राज्यभरात महापालिका निवडणुकीची रणधुमाळी सुरू आहे. या महापालिकेच्या निवडणुकांमध्ये उपमुख्यमंत्री अजित पवार यांनी पुणे आणि पिंपरी चिंचवड महापालिका निवडणूक प्रतिष्ठेची केली आहे. पुणे जिल्हा राष्ट्रवादी काँग्रेसचा बालेकिल्ला राहिला आहे. आणि या बालेकिल्ल्यांमध्ये आपलं वर्चस्व राखण्यासाठी अजित परवानांनी पूर्ण ताकद लावली आहे. यासाठी गेले काही दिवस अजित पवार पुण्यामध्ये ठाण मांडून आहेत.

त्यामुळे एकीकडे पुणे महापालिका निवडणुकीची रणधुमाळी सुरू असतानाच दुसरीकडे उपमुख्यमंत्री अजित पवार यांनी जिल्हा परिषद निवडणुकीची देखील फिल्डिंग लावण्यास सुरुवात केली आहे. कारण महापालिका निवडणुका नंतर अवघ्या काही दिवसातच जिल्हा परिषदा निवडणुका देखील होणार आहेत. त्यामुळे जिल्ह्यामध्ये पक्षाची घडी बसवण्याच्या दृष्टिकोनातून काही नेमणुका करण्यात आल्या आहेत.

इंदापूर नगरपालिकेच्या नगराध्यक्ष पदाच्या उमेदवारीवरून नाराज झालेल्या तत्कालीन राष्ट्रवादीच्या जिल्हाध्यक्ष प्रदीप गराटकर यांनी राजीनामा दिला होता. त्यानंतर रिक्त असलेल्या पुणे जिल्हाध्यक्ष पदावर आता अजित पवार यांनी तीन नेत्यांच्या नियुक्ती केल्या आहेत. आगामी निवडणुकीच्या दृष्टिकोनातून या नियुक्त्या करण्यात आल्या असून एक नव्हे तर तीन जिल्हाध्यक्ष राष्ट्रवादी काँग्रेसकडून नेमण्यात आले आहेत.

बारामती, इंदापूर, पुरंदर आणि दौंड यासाठी संभाजी होळकर यांची जिल्हाध्यक्ष म्हणून नियुक्ती करण्यात आली आहे. त्याचबरोबर भोर, मुळशी आणि मावळ यासाठी विठ्ठल शिंदे आणि शिरूर,जुन्नर खेड, आंबेगाव या भागाची जिल्हाध्यक्ष म्हणून राजेंद्र कोरेकर यांच्यावर जबाबदारी सोपविण्यात आली आहे.

मागील अनेक वर्ष पुणे जिल्हा परिषदेवर राष्ट्रवादी काँग्रेसची सत्ता आहे. आगामी काळात ही सत्ता अबाधित राखण्यासाठी अजित पवारांनी मास्टर प्लॅन बनवला आहे. त्याचाच भाग म्हणून ही नियुक्त करण्यात अली असल्याचे सांगितले जात आहे. आगामी जिल्हा परिषद निवडणुकांमध्ये देखील अजित पवार स्वबळावरती निवडणुका लढतील हे जवळपास निश्चित मानल्या जात आहे त्या दृष्टिकोनातून आतापासूनच दादांनी फिल्डिंग लावण्यात सुरुवात केली असल्याचं बोललं जात आहे.