Daund Firing News : एक भाऊ किर्तनात, दुसरा दौंडच्या कला केंद्रात : मांडेकर बंधूंचा सगळा इतिहास

Daund Firing News : मागील दोन दिवसांपासून राज्यभर गाजत असलेल्या पुणे जिल्ह्यातील दौंड तालुक्यातील चौफुला येथील अंबिका कला केंद्रातील गोळीबार प्रकरणात आतापर्यंत तिघांना अटक केली आहे. यात भोर-वेल्हा-मुळशीचे राष्ट्रवादी काँग्रेसचे आमदार शंकर मांडेकर यांचे बंधू बाळासाहेब मांडेकर यांच्यासह गणपत जगताप, रघुनाथ आव्हाड आणि चंद्रकांत मारणे अशी अटक केलेल्यांची नावे आहेत.

यावर बोलताना आमदार शंकर मांडेकर यांनी माझा भाऊ कला केंद्रावर गेला खूपच शॉकिंग असल्याचे म्हंटले आहे. माझ्या भावाकडे बंदूक परवाना नाही. भावासोबत गणपत जगताप होते त्यांच्याकडे बंदूक परवाना आहे. माझा भाऊ समाज कार्य करतो, शेती पाहतो, शिवाय वारकरी संप्रदायाच काम करतो. किर्तनात देखील असतो. मांडेकरांच्या प्रतिक्रियेमुळे खळबळ उडाली आहे.

किर्तनात असणारा भाऊ दौंडच्या कला केंद्रात कसा पोहोचला? मांडेकर बंधूंचा नेमका इतिहास काय आहे? त्यांची कौटुंबिक पार्श्वभूमी काय आहे? असे सवाल विचारले जात आहेत.

आमदार शंकर मांडेकर यांच्या वडिलांचे नाव हिरामण मांडेकर. या हिरामण मांडेकर यांना एकूण पाच भाऊ. या सहा भावंडांना त्यांचे वडील नेहमीच किर्तन, पारायण यासाठी घेऊन जात. त्यामुळे सर्वच जण वारकरी पंथातले म्हणून ओळखले जाऊ लागले. हिरामण मांडेकर आणि इतर भाऊ विभक्त झाले. आता शंकर मांडेकर यांच्या कुटुंबात आई, पत्नी, दोन मुले आणि भाऊ बाळासाहेब मांडेकर असे पाच जण आहेत.

आजही शंकर मांडेकर आणि बंधू बाळासाहेब मांडेकर हे स्वतः वारकरी संप्रदायाला मानतात. बाळासाहेब मांडेकर यांच्या गळ्यात तुळशीची माळ आहे. दोघांना कोणतेही व्यसन नाही. आमदार झाल्यापासून शंकर मांडेकर यांच्यावतीने सार्वजनिक कार्यात, विविध कार्यक्रमांत प्रतिनिधी म्हणून त्यांच्यावतीने 5 ते 6 जण जातात. त्यात बाळासाहेब मांडेकर यांचाही समावेश आहे.

शंकर मांडेकर यांचे राजकारणात येण्यापूर्वीच विविध व्यवसाय आहेत. यात प्रामुख्याने जमीन खरेदी-विक्री आणि वीट भट्टीचा व्यवसाय प्रसिद्ध आहे. या व्यवसायांमुळे आणि राजकारणात आल्यानंतर सार्वजनिक कामांमुळे शंकर मांडेकर यांना आधीपासूनच घराकडे आणि शेतीकडे लक्ष देता येत नाही. त्यामुळे त्यांनी वडिलोपार्जित शेती आणि वीट भट्टी व्यवसायाची जबाबदारी भाऊ बाळासाहेब मांडेकर यांच्यावर सोपविली.

थोडक्यात दोघेही भाऊ एकत्र असून दोघांचे एकमेकांसोबत चांगले संबंध आहेत. पण काही दिवसांपूर्वी बाळासाहेब मांडेकर यांनी वीट भट्टीचा व्यवसाय बंद केला. विटा आणि बांधकामासाठी लागणाऱ्या साहित्याच्या पुरवठ्याचा व्यवसाय सुरू केला. याच व्यवसायातून परिसरातील बहुमतांशी वीट भट्टी व्यावसायिक बाळासाहेब मांडेकर यांचे मित्र आहेत.

बाळासाहेब मांडेकर चौफुल्याच्या कला केंद्रात कसे पोहोचले?

मिळालेल्या माहितीनुसार, दौंड तालुक्यातही बाळासाहेब मांडेकर यांचे मित्र आहे. यातीलच एका मित्राच्या एका कार्यक्रमासाठी माण व मारुंजी या परिसरातील वीट भट्टी व अन्य व्यावसायिक मित्रांसोबत बाळासाहेब मांडेकर दौंडला गेले होते. दौंडला गेल्यानंतर वेळ जाईना म्हणून अन्य मित्रांनी अंबिका कला केंद्रात जायचं ठरवलं. त्यांच्यासोबत बाळासाहेब मांडेकरही तिथे पोहचले.

केंद्रात गेल्यावर आधी सुरु असलेला कार्यक्रम संपतच नसल्याने तिथे हवेत गोळीबार झाल्याचे सांगितले जाते. हा गोळीबार बाळासाहेब मांडेकर यांनी केला की अन्य कोणी याबाबत अद्याप माहिती मिळालेली नाही. तर रिव्हाल्वरची पुंगळी साफ करताना गोळीबार झाल्याचे मांडेकर यांच्या जवळच्या मित्रांकडून सांगितले जाते.