Kasba By-Election : रासनेंचा पराभव निश्चित : पण तो कमी मतांनी व्हावा यासाठी मुख्यमंत्री प्रचारात ; धंगेकरांचा मिश्किल टोला!

Kasba By-Election : कसबा मतदारसंघात भाजप उमेदवाराचा कमीत कमी मतांनी पराभव व्हावा, यासाठी भाजपकडून प्रयत्न केला जात आहे, असा मिश्किल टोला महाविकासआघाडी पुरस्कृत काँग्रेसचे उमेदवार रविंद्र धंगेकर यांनी लगावला आहे. कसब्याच्या पोटनिवडणुकीत धंगेकर आणि भाजपचे उमेदवार हेमंत रासने यांच्यात काटे की टक्कर आहे. राज्याचे मुख्यमंत्री आणि उपमुख्यमंत्री सगळी कामं सोडून कसब्यात फिरत आहेत, असेही धंगेकर म्हणाले.

विजय मिळाल्यास काय भूमिका असेल? असे विचारले असता, धंगेकर म्हणाले, "एकदा निवडणूक जिंकल्यानंतर विजयी उमेदवाराचे सत्कार-सन्मानाचे कार्यक्रम होत असतात. मात्र आपल्याला विजय मिळाल्यास सत्काराचे कार्यक्रम वगैरे न घेता, थेट कामाला सुरूवात करणार आहे."

"दिवंगत मुक्ता टिळक यांनी या मतदारसंघात कामे केली आहेत. त्यांचे पुढचे नियोजित कामे पूर्ण करून मी त्यांना श्रद्धांजली वाहणार आहे, असेही धंगेकर म्हणाले. "कसब्याची ही निवडणूक आता कसबेकरांनीच हातात घेतली आहे. आणि माझा कसबेकरांवर पूर्ण विश्वास असल्याने, माझा विजय हा निश्चित आहेच," असा विश्वास धंगेकरांनी व्यक्त केला.

दरम्यान, कसबा विधानसभा पोटनिवडणुकीचा प्रचार आता संपला आहे, आज प्रचाराचा शेवटचा दिवस होता. यामुळे उमेदवारांच्या प्रचारासाठी विविध राजकीय पक्षांचे नेते कसब्यात ठाण मांडून होते. राज्याचे मुख्यमंत्री एकनाथ शिंदे यांनी भाजपचे उमेदवार हेमंत रासने यांच्या प्रचारार्थ कसब्यामध्ये रोड शो केला, तर आघाडीतील नेत्यांनी धंगेकरांचा प्रचार करताना दिसले.