Kondhawa Firing: पुण्यात पुन्हा टोळीयुद्ध भडकलं! कोंढव्यात गोळीबाराची थरारक घटना; एकाचा मृत्यू अन्...

सुदेश मिटकर

Pune News : पुण्यातील कोंढवा परिसरात आज दुपारी खडी मशीन चौकात गोळीबाराची थरारक घटना घडली. या हल्ल्यात एक तरुण ठार झाला आहे. हल्लेखोरानं सुरुवातीला सलग चार गोळ्या झाडल्या नंतर कोयत्याने वार करून या तरुणाचा निर्घृण खून केला. त्यामुळं परिसरात दहशतीचे वातावरण पसरले आहे. हा टोळीयुद्धाचा भाग असल्याची चर्चा सध्या शहरात सुरु आहे.

पोलिसांच्या माहितीनुसार, गणेश काळे (वय अंदाजे २५) असं गोळीबारात मृत्यू झालेल्या तरुणाचं नाव आहे. गणेश हा गायकवाड टोळीतील कुख्यात गुंड समिर काळे याचा धाकटा भाऊ आहे. समीर काळे हा टोळीतील नंबरकरी आहे. वर्षभरापूर्वी झालेल्या माजी नगरसेवक वनराज आंदेकर हत्या प्रकरणात समीर काळे हा मुख्य आरोपींपैकी एक होता. सध्या पोलिसांनी त्याला अटक केली असून तो जेलमध्ये आहे. वनराज आंदेकर हत्या प्रकरणात समीर काळे याने बंदूक पुरवली असल्याचा देखील पोलीस तपासात उघड झाला आहे. या पार्श्वभूमीवर गणेशच्या हत्येला टोळीयुद्धाची किनार असल्याची शक्यता व्यक्त होत आहे. आंदेकर यांच्या हत्येनंतर प्रतिस्पर्धी टोळी यांच्यातील वैर वाढले असल्याचं दिसून येत आहे.

घटनेच्यावेळी खडी मशीन चौकात नागरिकांची ये-जा सुरू होती. अचानक गोळीबाराचा आवाज ऐकू आल्याने लोक पळापळ करू लागले. गुन्हेगाराने गोळ्या झाडल्यानंतर कोयत्याने वार करून घटनास्थळावरून पळ काढला. स्थानिकांनी तात्काळ पोलिसांना माहिती दिली. कोंढवा पोलीस ठाण्याचे पथक घटनास्थळी दाखल झाले असून, मृतदेह शवचिकित्सेसाठी रुग्णालयात पाठवण्यात आला आहे.

पोलिसांनी घटनास्थळाचा पंचनामा केला असून, सीसीटीव्ही फुटेज तपासले जात आहे. आरोपीच्या शोधासाठी विशेष पथके तयार करण्यात आली आहेत. गेल्या काही महिन्यांत अशा घटनांमध्ये वाढ झाली असून, ही घटना पुन्हा एकदा शहरातील कायदा-सुव्यवस्थेवर प्रश्नचिन्ह निर्माण करणारी ठरली आहे.