Local Body Election : लागा तयारीला! बुधवारपासून आचारसंहिता, 15 डिसेंबरला जिल्हा परिषदेसाठी मतदान, तर महापालिका...; मोठ्या नेत्याने तारीखच जाहीर केली

Dilip Walse Patil News : आगामी स्थानिक स्वराज संस्था निवडणुकीची तयारी निवडणूक आयोगाने पूर्ण केली आहे. निवडणुकीचे वेळापत्रक अजून जाहीर झालेले नाही. इच्छुकांनी तयारीला सुरुवात केली असून भेटीगाठी, दौरे सुरू झाले आहेत. महायुती किंवा महाविकास आघाडी होणार की नाही याची वाट न पाहाता इच्छुकांनी प्रचाराला सुरुवात केली आहे. त्यातच निवडणूका नेमक्या कधी जाहीर होणार आणि कधी मतदान होणार याची तारखी माजी मंत्री, राष्ट्रवादी काँग्रेसचे आमदार दिलीप वळसे पाटील यांनी जाहीर केली आहे.

राष्ट्रवादी काँग्रेस पक्ष आंबेगाव-शिरूर तर्फे आयोजित मेळाव्यात दिलीप वळसे पाटील मार्गदर्शन करताना म्हणाले, 'नगरपरिषदेची निवडणुका सुरू असताना जिल्हा परिषदेच्या निवडणुका जाहीर होतील. माझी जी माहिती आहे त्या माहिती प्रमाणे साधारणपणाने १५ डिसेंबरला जिल्हा परिषद निवडणुकीचे मतदान होईल. जिल्हा परिषदेच्या निवडणुका चालू असताना महानगरपालिकांच्या निवडणुका जाहीर होतील. 15 जानेवारीला महापालिका निवडणुकीचे मतदान होईल.'

पाच नोव्हेंबरला राज्यातील स्थानिक स्वराज संस्थांच्या निवडणुका जाहीर होतील, असा अंदाज दिलीप वळसे पाटील यांनी जाहीर केला. पाच नोव्हेंबरला बुधवार आहे म्हणजे त्याच दिवसापासून आचारसंहिता देखील लागू होईल. प्रथम नगर परिषदेच्या निवडणुका पार पाडतील, असे देखील त्यांनी सांगितले. या निवडणुका सुरू असतानाच जिल्हा परिषदेच्या निवडणुकीची घोषणा होईल.

महायुतीत स्वबळाचा नारा

महायुतीमधील पक्ष स्वबळावर लढणार की महायुतीत याची चर्चा सुरू आहे. मुंबई महापालिकेसाठी महायुती होईल आणि इतरत्र महायुतीमधील पक्ष स्वतंत्र लढतील अशी शक्यता आहे. मुख्यमंत्री देवेंद्र फडणवीस म्हणाले की पुणे आणि पिंपरी-चिंचवडमध्ये भाजप आणि राष्ट्रवादी काँग्रेस दोघांची ही ताकद आहे. जर येथे युती केली तर त्याचा फायदा महाविकास आघाडीतील पक्ष घेतील. त्यामुळे तेथे आम्ही स्वतंत्र लढू असे सांगितले. स्थानिक समीकरणानुसार युती करायची की नाही याचा निर्णय महायुतीमधील स्थानिक पातळीवरचे नेते घेणार आहेत.