Maratha Reservation : गणेशोत्सवानंतर आंदोलनाचा निर्णय करावा, बहुतांश मागण्यांवर सकारात्मक कार्यवाही सुरू; विखेंचं जरांगेंना आवाहन

Maratha protest News : "मराठा आरक्षणाच्या मागण्यांबाबत राज्य सरकारने बहुतांश मागण्यांवर सकारात्मक कार्यवाही सुरू केली आहे. सातारा आणि कोल्हापूर गॅझेटच्या मागण्यांबाबत काही कायदेशीर अडचणी असल्याने त्याबाबत ॲडव्होकेट जनरल यांचे मत मागविले आहे. त्यामुळे या प्रक्रियेसाठी वेळ द्यावा आणि गणेशोत्सवाच्या काळात आंदोलनामुळे भाविकांना त्रास होणार नाही, याची काळजी घ्यावी. गणेशोत्सवानंतर आंदोलनाबाबत निर्णय घ्यावा," असे आवाहन जलसंपदा मंत्री राधाकृष्ण विखे पाटील यांनी मनोज जरांगे यांना बुधवारी केले.

पुण्यात जलसंपदा विभागाच्या अभियांत्रिकी सेवेतील उत्कृष्ट अभियंता पुरस्कार वितरण सोहळ्यानंतर पत्रकारांशी संवाद साधताना ते बोलत होते. "जरांगे यांच्या मागण्यांपैकी बहुतांश मागण्यांवर सरकारने केवळ आश्वासन न देता कार्यवाही सुरू केली आहे. हैदराबाद गॅझेटसंदर्भातील प्रकरण न्यायालयात सुरू असताना नवीन गॅझेट काढल्यास आणि त्यावर न्यायालयाने स्थगिती दिल्यास कायदेशीर पेच निर्माण होऊ शकतो. त्यामुळे कायदेशीर मत मिळाल्यानंतरच पुढील निर्णय घेतला जाईल, असे विखे पाटील यांनी स्पष्ट केले.

मुख्यमंत्री आणि उपमुख्यमंत्र्यांबाबत जरांगे यांच्याकडून वापरल्या जाणाऱ्या अपशब्दांबाबतही विखे म्हणाले, "आंदोलन आणि मतप्रदर्शनाचा अधिकार लोकशाहीत आहे; मात्र वक्तव्य करताना संस्कृतीचे भान ठेवले पाहिजे. देवेंद्र फडणवीस आणि एकनाथ शिंदे यांनी मराठा आरक्षणासाठी केलेल्या कामाचा विचार करून त्यांच्याबाबतची वक्तव्ये टाळावीत."

चर्चेची दारे खुली...

"मनोज जरांगे यांच्या शिष्टमंडळातील अभ्यासकांशी सरकारचा संवाद सुरू असून चर्चेची दारे बंद केलेली नाहीत. आंदोलन बळाचा वापर करून थांबविण्याची सरकारची भूमिका नाही. संवादातून प्रश्न सोडविण्याचा प्रयत्न सुरू आहे. गणेशोत्सवाच्या काळात भाविकांना त्रास होऊ नये, यासाठी जरांगे यांनी आंदोलन स्थगित करावे," अशी अपेक्षा असल्याचे विखे पाटील यांनी सांगितले.