Murlidhar Mohol News : मंत्री मुरलीधर मोहोळ यांच्या वाहनाला कट मारला; तरुणावर गुन्हा दाखल, कोणते कलम लावले?

Pune news : केंद्रीय राज्यमंत्री मुरलधीर मोहोळ यांच्या वाहनाला भरधाव दुचाकीने कट मारल्याच्या कारणास्तव एका तरुणावर गुन्हा दाखल करण्यात आला आहे. ही घटना रविवारी (ता. १३) सप्टेंबरला शिवाजीनगर मधील संचेती चौक परिसरात घडली. बेदरकारपणे दुचाकी चालवत तरुणाने मोहोळ यांच्या ताफ्यातील वाहनास कट मारल्याचा आरोप आहे.

शिवाजीनगर पोलिसांनी नाना पेठेतील शुभम विजय वनित (वय ३२) या तरुणाविरुध्द गुन्हा दाखल केला आहे. सहायक पोलीस फौजदार ईश्वर लक्ष्मण भिकुले यांनी तक्रार दाखल केली आहे. भिकुले हे त्यादिवशी मोहोळ यांच्या सुरक्षेसाठी तैनात होते. रविवारी रात्री साडे आठ वाजण्याच्या सुमारास मंत्र्‍यांचा ताफा संचेती चौक परिसरात आल्यानंतर ही घटना घडली.

पोलिसांनी 'एफआयआर'मध्ये म्हटले आहे की, मंत्री मुरलीधर मोहोळ यांना घेऊन ताफा चौकातून जात असताना शुभम वनित याने दुचाकी भरधाव आणि निष्काळजीपणे चालवत ताफ्याला ओव्हरटेक केले. त्याच्या या पद्धतीच्या वाहनचालकामुळे रस्त्यावरील इतर वाहनचालक तसेच नागरिकांच्या जीवितास धोका निर्माण होण्याची शक्यता होती, असे पोलिसांनी नमूद केले आहे.

कोणती कलमे लावली?

शुभम वनित याच्याविरुध्द भारतीय न्याय संहितेतील कलम २८१ अंतर्गत गुन्हा दाखल करण्यात आला आहे. आपल्या ताब्यातील वाहन बेफिकीरपणे चालवून इतरांच्या जीवितास धोका निर्माण केल्यास या कलमांतर्गत गुन्हा दाखल केला जातो. याअंतर्गत सहा महिन्यांपर्यंत तुरुंगात किंवा एक हजार रुपये दंड किंवा दोन्ही अशी शिक्षेची तरतुद आहे.

त्याचप्रमाणे मोटार वाहन कायद्यातील कलम १८४ आणि १८५ अंतर्गतही गुन्हा दाखल झाला आहे. या कलमांमध्ये पहिल्या गुन्ह्यासाठी ६ महिने तुरुंगवास किंवा एक हजारांचा दंड किंवा दोन्ही, तसेच या घटनेनंतर तीन वर्षांच्या आता दुसऱ्या किंवा त्यानंतरच्या गुन्ह्यासाठी २ वर्षे किंवा २ हजार रुपये दंड किंवा दोन्ही अशी शिक्षेची तरदुत आहे.