NCP Politics: 'होम पिच'वरच शरद पवारांना धक्का? अजितदादा मोठा डाव टाकण्याच्या तयारीत!

Pune News, 15 Jun : पिंपरी-चिंचवड शहरात राष्ट्रवादी काँग्रेसमधील अंतर्गत हालचालींना सध्या मोठा वेग आला आहे. गेल्या काही दिवसांपासून दोन्ही राष्ट्रवादी पुन्हा एकत्र येणार अशी चर्चा सुरु आहे.

मात्र, एकीकडे एकत्रि‍करणाच्या चर्चा सुरू असताना दुसरीकडे पिंपरी चिंचवडमधील 'होम पिचवर' राष्ट्रवादी काँग्रेस शरदचंद्र पवार पक्षाला आगामी महापालिका निवडणुकीच्या पार्श्वभूमीवर जोरदार धक्का मिळण्याची शक्यता व्यक्त केली जात आहे.

पुन्हा गव्हाणेंची ‘घरवापसी’?

पूर्वी अजित पवारांच्या राष्ट्रवादीचे शहराध्यक्ष राहिलेले आणि विधानसभा निवडणुकीच्या पार्श्वभूमीवर शरद पवारच्या पक्षात सहभागी होऊन भोसरी विधानसभा निवडणूक लढवून पराभूत झालेले अजित गव्हाणे पुन्हा एकदा चर्चेचं आले आहेत.

दोन दिवसांपूर्वी अजित गव्हाणे यांनी उपमुख्यमंत्री अजित पवारांची भेट घेतली. त्यानंतर त्यांचं पुन्हा अजित पवार गटात ‘घरवापसी’ होणार का? या चर्चांना जोर चढला आहे. गव्हाणे यांनी माध्यमांशी बोलताना स्पष्ट केलं की, "शहरातील प्रलंबित प्रश्नांवर चर्चा झाली. टीपी स्कीम संदर्भात अजित दादांसोबत चर्चा झाली.

मात्र, पक्ष प्रवेशाबाबत कोणतीही चर्चा झालेली नाही. पुढे योग्य तो निर्णय घेतला जाईल." तरीही त्यांच्या या भेटीमागे निव्वळ विकासकामांचीच चर्चा होती का, हा प्रश्न देखील चर्चेचा विषय बनला आहे. यंदाच्या विधानसभा निवडणुकीत गव्हाणे यांनी भोसरी विधानसभा मतदारसंघातून लढण्याची इच्छा व्यक्त केली होती.

मात्र ही जागा भाजपकडे गेल्याने अजित पवार यांनी त्यांना तिकीट नाकारलं आणि त्यामुळे गव्हाणे यांनी शरद पवारांच्या गटात प्रवेश केला होता. त्यांच्या नेतृत्वाखाली 25 माजी नगरसेवक शरद पवार गटात सामील झाले होते.

मात्र, विधानसभा निवडणुकीत गव्हाणे यांना भाजपा आमदार महेश लांडगे यांच्या विरोधात पराभव स्वीकारावा लागला. त्यानंतर काही काळ गव्हाणे शांत होते. दरम्यान, त्यांना शिंदेच्या सेनेत पक्ष प्रवेश करण्याची ऑफर मिळाली होती पक्षप्रवेशाबरोबर त्यांना व्यवस्थित महामंडळातील पदाची ऑफर देतील देण्यात आल्याच्या चर्चा होत्या.

मात्र गव्हाणे यांनी विधान परिषदेची मागणी केल्याचे देखील बोललं गेलं . पण त्यांच्या समर्थक माजी नगरसेवकांनी अजित पवार यांच्यासोबतच आपली नाळ जोडलेली असल्याचे अजित पवारांच्या राष्ट्रवादीचा विचार करावा असं लावून धरल्याने गव्हाणेंचा शिंदे गटात प्रवेश रखडला.

शरद पवारांच्या ‘होम पिच’वर मोठा धक्का?

गव्हाणे आणि त्यांच्या समर्थक नगरसेवकांचा शरद पवार गटातून बाहेर पडण्याचा निर्णय झाल्यास, हे शरद पवार यांच्यासाठी मोठं आव्हान ठरेल. विशेषतः महानगरपालिका निवडणुका जवळ येत असताना ही गळती पक्षाच्या संघटनात्मक ताकदीवर परिणाम करू शकते.

याच पार्श्वभूमीवर शरद पवार 17 जून रोजी स्वतः पिंपरी चिंचवडमध्ये येणार असून, स्थानिक पक्षाच्या कामकाजाचा आढावा घेणार आहेत. त्यांच्या या दौऱ्याच्या पार्श्वभूमीवर स्थानिक नगरसेवक काय निर्णय घेतात, हे पाहणं महत्वाचं ठरणार आहे.