Pimpri Chinchwad News : उद्योनगरीतील चिंचवड, भोसरी आणि पिंपरी या तीनपैकी पिंपरी हा राखीव विधानसभा मतदारसंघ असून, तो राष्ट्रवादी काँग्रेसने (शरद पवार गट) आता आपल्या रडारवर घेतला आहे. कारण तेथे अजित पवारांबरोबर गेलेले पक्षाचे आमदार अण्णा बनसोडे आहेत. स्वत: शरद पवारांनी पिंपरीत जातीने लक्ष घातल्याने आगामी विधानसभेला येथे राष्ट्रवादी विरुद्ध राष्ट्रवादी असा सामना रंगण्याची शक्यता आहे. (Latest Marathi News)
कथित पक्षफुटीनंतर शरद पवारांचा पिंपरी-चिंचवडमधील पहिला कार्यक्रम (भारतीय भटक्या विमुक्त प्रतिष्ठा संघाचा) हा काल (ता.२) संध्याकाळी पिंपरी मतदारसंघात दापोडीत झाला. त्याअगोदर परवा त्यांनी उत्तर पुणे जिल्ह्याचा दौरा (शिरूर लोकसभा मतदारसंघ) केला.अजित पवारांबरोबर गेलेल्या तेथील आमदारांना नेमका संदेश दिला. तसेच तटस्थ असलेले जुन्नर आणि शिरूरचे आमदार आपल्याबरोबर कसे येतील, याची त्यांनी साखरपेरणीही केली. त्यानंतर त्यांनी आपला दौरा आता पिंपरी-चिंचवडकडे वळवला आहे. अगोदरच तेथील जबाबदारी ही युवा आमदार रोहित पवारांवर सोपविली आहे. त्यांना प्रदेशाध्यक्ष जयंत पाटील यांनीसुद्धा १५ दिवसांतून एकदा उद्योगनगरीचा दौरा करण्यास सांगितले आहे.
शरद पवार आणि रोहित पवार हे पिंपरीत दुसरी फळी आणि त्यातही तरुणांची फळी उभी करायला लागले आहेत. हाच मतदारसंघ जिंकणे त्यांना सोपा असल्याने तो त्यांनी रडारवर घेतला आहे. काऱण चिंचवड आणि भोसरीत भाजपचे ताकदवार आमदार आहेत. गतवेळी तेथे त्यांच्या पक्षाला उमेदवारही देता आला नव्हता, तर पिंपरीत विजय मिळाला होता म्हणून त्यांनी पिंपरीच आपल्या रडारवर घेतला आहे. तेथे त्यांच्याकडे तुल्यबळ उमेदवारही आहेत.
दरम्यान, तेथील विद्यमान आमदार अण्णा बनसोडे हे पवारांच्या निशाण्यावर येण्याची शक्यता आहे. चालू महिन्यात किंवा पुढील महिन्यात ते उद्योगनगरीचा दौरा करणार असून, त्यावेळी काहींची घरवापसी होणार आहे. या सभांमधून पवार हे पिंपरी आणि बनसोडेंना लक्ष्य करतील, असा अंदाज आहे.
गतवेळी २०१९ ला पिंपरीतून पक्षाच्या तत्कालीन तरुण नगरसेविका सुलक्षणा शिलवंत-धर यांना राष्ट्रवादीने तिकीट दिले होते. मात्र, ऐनवेळी ते रद्द करून बनसोडेंना अजित पवारांनी दिले. त्याच शिलवंत या एकमेव माजी नगरसेवक यांनी पक्षफुटीनंतर उघडपणे शरद पवार गटाला साथ दिली आहे. आता त्यांनीच पुन्हा पिंपरीतून लढण्याची जोरदार तयारी सुरू केली आहे. आघाडीच्या सुलक्षणा शिलवंत-धर, तर महायुतीचे बनसोडे हे उमेदवार असतील, असा रागरंग दिसतो आहे.
भाजपही येथून तयारीत आहे. अमित गोरखे हा त्यांचा तरुण पदाधिकारी तयारी करीत आहे. मात्र, विद्यमान आमदारांनाच उमेदवारी मिळण्याची अधिक शक्यता आहे. बनसोडे आणि शिलवंत अशी राष्ट्रवादीतच पिंपरीत जुंपणार असे चित्र सध्या तरी आहे. लोकसभेबरोबर विधानसभा निवडणूक झाली नाही आणि लोकसभा निवडणुकीनंतर राजकीय समीकरणे पुन्हा बदलली नाहीत, तर हेच चित्र कायम राहू शकते.
(Edited By - Chetan Zadpe)
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.