Laxman Hake On Ajit Pawar: बारामतीतून नोटीस, अजितदादांची माफी मागा! लक्ष्मण हाके म्हणतात,'मी रोज शंभर शिव्या घालणार...'

Pune News : गेल्या काही दिवसांपासून ओबीसी आंदोलन लक्ष्मण हाके हे सातत्याने उपमुख्यमंत्री अजित पवार यांच्यावर टीका करताना पाहायला मिळत आहेत. त्यानंतर आता अजित पवारांच्या बारामतीतील एका कार्यकर्त्यांनी लक्ष्मण हाके यांना कायदेशीर नोटीस पाठवून माफी मागण्या सांगितला आहे. मात्र, मी शंभर शिव्या देईल माफी मागणार नाही अशी भूमिका लक्ष्मण हाके (Laxman Hake) यांनी घेतल्याचे पाहायला मिळत आहे

राज्याचे उपमुख्यमंत्री अजित पवार यांच्याबद्दल नेहमी हेतुपूरस्कर बेताल आणि शिवराळ भाषेत लक्ष्मण हाके वक्तव्य करत असल्याचे सांगत बारामतीमधील नितीन संजय यादव यांनी कायदेशीर नोटीस बजावली आहे. यामध्ये सात दिवसांत हाके यांनी अजित पवार यांची लेखी माफी न मागितल्यास न्यायालयात खेचण्याचा इशारा दिला आहे.

या नोटीसमध्ये लक्ष्मण हाके यांनी 7 दिवसांत अजित पवार (Ajit Pawar) यांची लेखी माफी न मागितल्यास त्यांना न्यायालयात खेचून दिवाणी,फौजदारी व अब्रुनुकसानीचा दावा दाखल करणार आहे, असं यादव यांनी सांगितले आहे.

यानंतर लक्ष्मण हाके यांनी याबाबत प्रतिक्रिया दिली असून ते म्हणाले, असल्या नोटीसला मी भीक घालत नाही. अजित पवार यांची मी अजिबात माफी मागणार नाही.

तसेच यापुढे देखील मी OBC च्या प्रश्नांसाठी अजित पवारांना रोज शंभर शिव्या देणार आहे. Obc च्या मागण्या मान्य होत नाही, तोवर आम्ही दिवसाला शेकडो शिव्या देणार असल्याचं हाके यांनी सांगितलं. तसेच ओबीसीच्या विद्यार्थ्यांसाठी जीव गेला तरी बेहत्तर असंही हाके यांनी सांगितलं.

मला जेलमध्ये टाका, मला काळं फासा, काही केलं तरी चालेल. मात्र, मी अजित पवारांच्या चेल्या-चपाट्यांना घाबरत नाही, असं वक्तव्य लक्ष्मण हाके यांनी केलं आहे. यामुळे पुन्हा एकदा हाके विरुद्ध अजित पवार समर्थक असा वाद पेटण्याची शक्यता आहे.