Pradeep Kurulkar Case Update : कुरुलकरांनंतर आता वायुदलाचा अधिकारीही 'हनीट्रॅप'चा शिकार; 'एटीएस'चा धक्कादायक खुलासा

Pune : संरक्षण संशोधन व विकास संस्थेचे शास्त्रज्ञ प्रदीप कुरूलकर यांच्या एटीएस चौकशीदरम्यान अनेक धक्कादायक बाबी समोर येत आहेत. प्रदीप कुरूलकर यांच्यासह तर भारतीय गुप्तचर खात्यामध्ये कार्यरत असणाऱ्या एका अधिकाऱ्यालाही हनीट्रॅपमध्ये अडकवण्याचं तपासात समोर आल्यानंतर एकच खळबळ उडाली होती. मात्र, आता या प्रकरणात आणखी धक्कादायक बाब समोर आली आहे. या हनीट्रॅप प्रकरणात वायुदलाचा अधिकारीही अडकल्याची माहिती समोर आली आहे.

प्रदीप कुरुलकर हे सध्या एटीएसच्या कोठडीत असून त्यांची सध्या कसून चौकशी करत आहेत. प्रदीप कुरुलकर यांना हनीट्रॅपमध्ये अडकवून पाकिस्तानच्या गुप्तचर यंत्रणांनी त्यांच्याकडून भारताविषयीची गोपनीय माहिती काढून घेतल्याचे वृत्त समोर आले होते. प्रदीप कुरुलकर यांना ज्या महिलेने हनीट्रॅपमध्ये अडकवले तिने गुप्तचर खात्यातील एका अधिकाऱ्याशीही संपर्क साधला होता. प्रदीप कुरुलकर यांच्या चौकशीदरम्यान ही माहिती समोर आली आहे. आता हवाईदलाचा अधिकारी असलेला निखील शेंडेही पाकिस्तानी(Pakistan) गुप्तचर यंत्रणेच्या संपर्कात असल्याचं एटीएसच्या तपासात समोर आलं आहे.

प्रदीप कुरूलकर(Pradeep Kurulkar) यांना हनीट्रॅपमध्ये अडकवण्यात आले असले तरी संबंधित महिलेने त्यांना ब्लॅकमेल केले नव्हते. या महिलेने कुरुलकर यांच्याशी प्रेमाने आणि गोडगोड बोलून माहिती काढून घेतली. 'मला भारतीयांचा अभिमान आहे. तुम्ही चांगले शास्त्रज्ञ आहात. मी पण भारतीय आहे. तुम्ही ज्या क्षेत्रात काम करत आहात, त्याच क्षेत्रात मलाही देशासाठी काहीतरी करायचं आहे', असे ही महिला कुरुलकर यांना सांगत होती. याचदरम्यान बोलण्यात गुंतवून गोडीगुलाबीने महिलेने ब्राह्मोस, अग्नी यासारख्या भारताच्या क्षेपणास्त्रांविषयीची गोपनीय माहिती कुरूलकर यांच्याकडून काढून घेतल्याचा संशय आहे.

एटीएस(ATS)चा जो अधिकारी महिलेच्या संपर्कात आला होता, त्यानेदेखील कोणती गोपनीय कागदपत्रं पाकिस्तानला दिली आहेत का, याचा शोध एटीएसकडून घेतला जात आहे. दरम्यान, एटीएसच्या अधिकाऱ्यांकडून आतापर्यंतच्या चौकशीत समोर आलेली माहिती पंतप्रधान मोदी आणि राष्ट्रीय सुरक्षा सल्लागारांना दिली आहे.

(Edited By Deepak Kulkarni)