Baramati Politic's : बारामतीत पवार काका-पुतणे पुन्हा आमने सामने; ‘माळेगाव’च्या निवडणुकीत चौरंगी लढतीचा फायदा कोणाला होणार

Malegaon, 13 June : माळेगाव सहकारी साखर कारखाना निवडणुकीच्या इतिहासात यंदा प्रथमच चौरंगी लढत होत आहे. विशेष म्हणजे लोकसभा आणि विधानसभा निवडणुकीनंतर पवार काका-पुतणे पुन्हा एकदा आमने सामने उभे ठाकले आहेत. माळेगाव कारखान्यासाठी उपमुख्यमंत्री अजित पवार यांचा नीळकंठेश्वर, ज्येष्ठ नेते शरद पवारांच्या पक्षाचा बळिराजा सहकार बचाव, पारंपारिक विरोधक चंद्रराव तावरे, रंजन तावरे यांचा सहकार बचाव शेतकरी पॅनेल आणि कष्टकरी शेतकरी समिती व अपक्षांचा एक पॅनेल, असे चार पॅनेल या निवडणुकीच्या रिंगणात असणार आहेत.

दरम्यान, उपमुख्यमंत्री अजित पवार (Ajit Pawar) यांनी माळेगाव सहकारी साखर कारखान्यासाठी आपला उमेदवारी अर्ज कायम ठेवला असून आपल्या नीळकंठेश्वर पॅनेलकडून विद्यमान सात संचालकांना, तर माजी पाच संचालकांना पुन्हा निवडणुकीच्या मैदानात उतरविले आहे, त्यामुळे ‘माळेगाव’च्या निमित्ताने बारामतीचे राजकारण पुन्हा एकदा तापणार आहे.

माळेगाव सहकारी साखर कारखान्याच्या निवडणुकीत (Malegaon Sugar Factory elections) गुरुवारी (ता. 12 जून) उमेदवारी अर्ज मागे घेण्याचा शेवटचा दिवस होता. मात्र, या माघारीच्या दिवसापर्यंत मातब्बरांनी आपले उमेदवारी अर्ज कायम ठेवल्याने तडजोडीला यश येऊ शकले नाही. त्यामुळे माळेगावच्या निवडणुकीच्या रिंगणात चार पॅनेल उतरले आहेत.

माळेगाव साखर कारखान्याची निवडणूक जाहीर झाल्यापासून सत्ताधारी आणि विरोधकांमध्ये तडजोड होईल, अशी चर्चा रंगली होती. संबंधित नेत्यांमध्ये तडजोडीसाठी बैठकही झाल्या होत्या, त्यासाठी अजित पवार यांच्या वतीने छत्रपती सहकारी साखर कारखान्याचे नवनिर्वाचित अध्यक्ष पृथ्वीराज जाचक, किरण गुजर, राजवर्धन शिंदे, ॲड. केशवराव जगताप, बाळासाहेब तावरे, संभाजी होळकर, मदनराव देवकाते आदी नेते प्रयत्न करत होते.

विरोधकांकडून चंद्रराव तावरे आणि रंजन तावरे यांनी संबंधितांबरोबर चर्चा केली होती. शरद पवार यांच्या पक्षाकडून ॲड. एस. एन. जगताप आणि गणपतराव देवकाते यांनी अजित पवार यांच्याबरोबर बोलणी केली होती. प्रत्यक्षात तडजोडी झाल्याच नाहीत, त्यामुळे माळेगाव कारखान्याच्या निवडणुकीत कधी नव्हे एवढे चार पॅनेल रिंगणात उतरले आहेत.

लोकसभा विधानसभा निवडणुकीनंतर उपमुख्यमंत्री अजित पवार तसेच ज्येष्ठ नेते शरद पवार यांच्या वतीने युगेंद्र पवार यांची प्रतिष्ठा पणाला लागणार आहे. तसेच, पवारांना या वेळी पारंपारिक विरोधक चंद्रराव तावरे आणि रंजन तावरे यांचे कडवे आव्हान असणार आहे. कारण, दोन्ही पवार एकत्र असताना मागील पंचवार्षिक निवडणुकीत चंद्रराव तावरे आणि रंजन तावरे यांनी माळेगाव सहकारी साखर कारखान्याची निवडणूक जिंकली होती.

आता दोन्ही पवार निवडणुकीच्या मैदानात वेगवेगळ्या पॅनेलच्या माध्यमातून उतरले आहेत, त्यामुळे पवार गटाची ताकद दोन गटांत विखुरली गेली आहे, त्यामुळे या चौरंगी लढतीचा फायदा नेमका कोणाला होणार, हे निवडणुकीच्या निकालातूनच दिसून येणार आहे.