Pune BJP: पुण्यात भाजपचा डबल धमाका : मुरलीधर मोहोळांनी माजी मंत्र्याचं घर फोडलं; एकनिष्ठ शिवसैनिकही गळाला

PMC Election Pune News: आगामी महापालिका निवडणुकीच्या पार्श्वभूमीवर पुण्यासह संबंध महाराष्ट्रात शिवसेना उद्धव बाळासाहेब ठाकरे पक्षाला गळती लागल्याचे पाहायला मिळत आहे. ही गळती सुरूच असून आहे. आता पुण्यामध्ये देखील ठाकरे सेनेचे आणखी दोन मोहरे भाजपच्या गळाला लागले आहेत.

महापालिका निवडणुकीच्या पार्श्वभूमीवर दुसऱ्या टप्प्यातील पक्ष प्रवेश आज घेण्यात आले. खासदार मुरलीधर मोहोळ आणि शहराध्यक्ष धीरज घाटे यांच्या उपस्थितीत हे प्रवेश झाले. यापूर्वी पहिल्या टप्प्यातील नेत्यांचे प्रवेश मुंबईमध्ये घेण्यात आले होते.

या पहिल्या टप्प्यामध्ये 11 नेत्यांचे प्रवेश दिल्यानंतर दुसऱ्या टप्प्यात भाजपने ठाकरे सेनेच्या दोन माजी नगरसेवकांना प्रवेश दिला आहे. यापूर्वी देखील विधानसभा निवडणुकीनंतर ठाकरे सेनेच्या पाच माजी नगरसेवकांनी भाजपमध्ये प्रवेश केला होता.

शिवसेनेच्या फुटीनंतर पुण्यातील एक माजी नगरसेवक वगळता सर्वच 9 नगरसेवक ठाकरेंच्या सेने सोबत राहिले होते. माजी नगरसेवकांनी भाजपमध्ये प्रवेश केला होता, त्यानंतर आज माजी नगरसेवक संजय भोसले आणि पृथ्वीराज सुतार यांनी भाजपमध्ये प्रवेश केला आहे. ठाकरे सेनेच्या माजी नगरसेविका श्वेता चव्हाण यांनी नुकताच अजित पवार यांच्या राष्ट्रवादी काँग्रेसमध्ये प्रवेश केला आहे.

त्यामुळे सद्यस्थितीला 2017 च्या निवडणूक आलेल्या शिवसेनेच्या 10 नगरसेवकांपैकी एकही नगरसेवक सध्या ठाकरेंच्या सेने सोबत नसल्याचे पाहायला मिळत आहे. त्यामुळे ठाकरेंच्या माजी नगरसेवकांची संख्या शून्यावर आली असल्याची चर्चा सध्या राजकीय वर्तुळात सुरू झाली आहे.

2017 निवडून आलेले शिवसेनेचे 10 नगरसेवक सध्या कुठे?

संगीता ठोसर, बाळा ओसवाल, पृथ्वीराज सुतार, संजय भोसले, पल्लवी जावळे, विशाल धनवडे, प्राची आल्हाट हे सात नगरसेवक सध्या भाजपसोबत आहेत. तर अविनाश साळवे हे विधानसभा निवडणुकी वेळी काँग्रेसमध्ये गेले होते. आणि श्वेता चव्हाण यांनी नुकताच अजित पवारांच्या राष्ट्रवादी काँग्रेसमध्ये प्रवेश केला आहे. त्यामुळे सध्या तरी 2017 मध्ये निवडणूक लढलेला एकही माजी नगरसेवक ठाकरे सेने नसल्याचा पाहायला मिळत आहे.