PMC Election: सर्व्हेत भाजपच्या 50 जागा धोक्यात! मित्रपक्षांना विचारात घ्या अन्यथा...; राष्ट्रवादीचा भाजपला इशारा

PMC Election 2025: महापालिका निवडणुकांसाठी आता सर्वच प्रमुख पक्षांची मोर्चेबांधणी सुरु झाली आहे. महायुतीमध्ये यावरुन सध्या खळबळ पाहायला मिळते आहे. जागा वाटपावरुन महायुतीतील तीन पक्षांमध्ये सहमती होताना दिसत नाहीए. यासाठी निवडणूक पूर्व सर्व्हेक्षणाचे दाखलेही दिले जात आहेत. महायुतीतील अजित पवारांच्या राष्ट्रवादीनं एका सर्व्हेचा उल्लेख करत भाजपला थेट इशाराच दिला आहे.

नेमका विषय काय?

राष्ट्रवादी काँग्रेसचे (AP) शहराध्यक्ष सुभाष जगताप यांनी दावा केला आहे की, भाजपने जो सर्वे केला होता त्यामध्ये भाजपने सांगितलं आहे की, आमच्या 50 जागा धोक्यात आहेत. याचा विचार करून त्यांनी महायुतीतील घटक पक्षांची जागेबाबत विचार करावा. महायुती म्हणून आम्ही एकत्र असल्यानं जर भाजपने आमचा विचार केला नाही केला तर आम्ही स्वबळावर लढू. आंदेकर कुटुंबियांनी आमच्याकडं अद्यापतरी उमेदवारी मागितलेली नाही. शिवसेनेचे अस्तित्व पुण्यात कुठे दिसत नाही. शिवसेनेचा एकच नगरसेवक आहे. त्यामुळे भाजपने मित्र पक्षांचा विचार नाही केला तर आम्ही स्वबळावर लढू असा इशारा सुभाष जगताप यांनी दिला आहे.

भानगिरे-धंगेकर दोन गट

दरम्यान, शिवसेना नेते आणि कसब्याचे माजी आमदार रवींद्र दंगेकर यांनी पत्रकार परिषद घेत शिवसेना पुण्यात 165 जागांवरती लढणार असल्याचं जाहीर केलं आहे. मात्र, शिवसेना शहर प्रमुख नाना भानगिरे आणि रवींद्र धंगेकर यांच्यामध्ये दोन गट पडल्याचं आज या पत्रकार परिषदेमधून पाहायला मिळालं. तर रवींद्र घाटे यांनी आम्ही महायुतीत आहोत मित्र पक्षांबरोबर आम्ही एकत्रित चर्चा करून निवडणूक लढवू असं सांगितलं आहे.

125 जागांवरती भाजपने दावा केला आहे. तर राष्ट्रवादी अजित पवार पक्षाचे शहर अध्यक्ष सुभाष जगताप यांनी शिवसेना आणि भाजप वरती टीका करत आपली भूमिका मांडली असून स्वबळावर लढण्याचा नारा दिला आहे. त्यामुळे महायुतीमध्ये अलबेला असल्याचे चित्र पाहायला मिळतंय. शिवसेनेमध्ये दोन गट पडले असून शिवसेनेचे अस्तित्वच पुण्यात कुठे दिसत नाही असं सुभाष जगताप यांनी सांगत शिवसेनेला डिवचलं.