PMC Corporators: पहिल्यांदाच निवडून आलेल्या नगरसेवकांना मिळणार प्रशिक्षण; पुणे महापालिकेचा महत्वाचा निर्णय

PMC Corporators: महापालिकेच्या निवडणुकीत सभागृहामध्ये १०१ नगरसेवक पहिल्यांदाच निवडून आलेले आहेत. त्यांना महापालिकेच्या काराभाराची व्यवस्थित माहिती मिळावी, कायदे कळावेत. अधिकार आणि कर्तव्य याचीही माहिती व्हावी यासाठी प्रशासनातर्फे नगरसेवकांसाठी यशदामध्ये प्रशिक्षण आयोजित केले जाणार आहे.

पुणे महापालिकेची निवडणूक झाल्यानंतर पुढील काही दिवसांत नगरसेवकांच्या हाती कारभार जाणार आहे. गेल्या पावणे चार वर्षापासून महापालिकेत प्रशासक राजवट होती, ती दोन आठवड्यात संपणार आहे. या महापालिकेच्या निवडणुकीत सर्वच राजकीय पक्षांनी नवीन चेहऱ्यांना संधी दिली आहे. १६५ जणांच्या सभागृहात १०१ नगरसेवक हे पहिल्यांदाच निवडून आलेले आहेत. तर ६४ नगरसेवक हे यापूर्वीही सभागृहात होते, त्यामुळे त्यांना कामाचा अनुभव आहे.

पण नव्याने निवडून आलेल्या नगरसेवकांना प्रत्यक्ष सभागृहाचे काम कसे चालते, कोणत्या कायद्यानुसार काम चालते. त्यातील महत्त्वाच्या तरतुदी काय आहेत? नगरसेवकांना कोणते अधिकारी आहेत? त्यांची कर्तव्य काय आहेत? त्याचप्रमाणे शहराच्या कामकाजात प्रशासनाची भूमिका आणि नगरसेवकाची भूमिका काय असते? दोन्ही मध्ये समन्वय असल्याचा त्याचा फायदा कसा होतो? यांसह अन्य विषयांवर प्रशिक्षण शिबिर आयोजित केले जाणार आहे.

पुणे महापालिकेत अनेक नवीन नगरसेवक निवडून आले आहेत. त्यांना महापालिकेच्या कामाची माहिती व्हावी यासाठी लवकरच यशदामध्ये प्रशिक्षण शिबिर आयोजित केले जाईल. त्यासाठी तज्ज्ञांकडून मार्गदर्शन केले जाईल, अशी माहिती महापालिका आयुक्त नवल किशोर राम यांनी दिली.