मिरवणूक प्रकरण : गुंड गजानन मारणेचा जामीन अर्ज फेटाळला

सरकारनामा ब्यूरो

पुणे : तळोजा कारागृहातून सुटका झाल्यानंतर कारच्या ताफ्यातून मिरवणूक काढल्याप्रकरणी दाखल गुन्ह्यांत कुख्यात गुंड गजानन मारणे याचा जामीन अर्ज न्यायालयाने फेटाळून लावला आहे. सत्र न्यायाधीश ए. एन. मरे यांनी हा निकाल दिला.

मिरवणुकीद्वारे नागरिकांमध्ये दहशत निर्माण करणे तसेच सरकारी कामात अडथळा निर्माण केल्याप्रकरणी मारणेविरोधात हिंजवडी पोलिस ठाण्यातदेखील गुन्हा दाखल आहे. त्या गुन्ह्यातदेखील मारणे याचा जामीन यापूर्वी फेटाळण्यात आला आहे. पुणे-बंगळूर बाह्यवळण महामार्गावर चांदणी चौकात १५ फेब्रुवारी रोजी रात्री हा प्रकार घडला होता. मारणे आणि त्याच्या साथीदारांनी मिरवणुकीची ध्वनिचित्रफीत समाजमाध्यमांवर प्रसारित करून दहशत निर्माण केली होती. याप्रकरणी मारणे आणि साथीदारांविरोधात कोथरूड, वारजे तसेच ग्रामीण पोलिस ठाण्यांत गुन्हे दाखल करण्यात आले होते.

मारणे याने वारजे माळवाडी पोलिस ठाण्यात दाखल गुन्ह्यांत जामीन मिळावा यासाठी अर्ज केला होता. त्यास अतिरिक्त सरकारी वकील राजेश कावेडिया यांनी विरोध केला. गजा मारणे हा टोळी चालवितो. तो आणि त्याच्या साथीदारांविरोधात विविध पोलिस ठाण्यांत खून, खुनाचा प्रयत्न, खंडणी, दरोडा, अपहरण, दंगा करणे, बेकायदेशीर जमाव जमविणे, गंभीर दुखापत करणे, बेकायदेशीर मालमत्ता बळकाविणे, जाळपोळ आदी गुन्हे दाखल आहेत. तसेच मोका कायद्यान्वयेही गुन्हे दाखल आहेत, असे ॲड. कावेडिया यांनी न्यायालयास सांगितले.

आर्थिक मदत करणाऱ्यांचा शोध सुरू

आरोपींनी दहशत निर्माण करीत सरकारी कर्मचाऱ्‍यास ढकलून दिले होते. तसेच कारचे सनरूफ उघडे ठेवून स्वत:ला बाहेर प्रदर्शित करून दहशत माजवीत असल्याचे स्पष्टपणे दिसत आहे. आरोपीने कोणत्या हेतूने रॅली काढली मिरवणुकीचे आयोजन कोणी केले? तसेच यासाठी आर्थिक पुरवठा कोणी केला? याचा शोध घ्यायचा असल्याचा युक्तिवाद ॲड. कावेडिया यांनी केला.

EDited By : Umesh Ghongade