PMC : पुणे महापालिकेच्या नव्या मुख्यालयासाठी जागा ठरली? शिवाजीनगरमधील 'त्या' जागेवर लक्ष!

Pune News, 08 Nov : महापालिका हद्दीत ३२ गावांचा समावेश झाल्यानंतर प्रशासनाचा व्याप मोठ्या प्रमाणात वाढला असून, त्याचा ताण सध्याच्या मुख्यालयावर पडू लागला आहे. वाढती लोकसंख्या, कर्मचारी संख्या आणि प्रशासकीय कामकाजाची गरज लक्षात घेऊन शिवाजीनगर येथील शिवाजी आखाड्याच्या जागेवर महापालिकेची स्वतंत्र आणि अत्याधुनिक प्रशासकीय इमारत उभारण्याच्या हालचाली सुरू झाल्या आहेत. त्यासाठी सुमारे अडीच एकर जागेचा विचार सुरू असून, नव्या प्रशासकीय केंद्राचा प्राथमिक प्रस्ताव तयार करण्याच्या दृष्टीने चाचपणी सुरू झाली आहे.

महापालिकेची स्थापना १९५० मध्ये झाली. त्यानंतर १९६६ मध्ये सध्याच्या मुख्यालयाची इमारत उभारण्यात आली. वाढत्या प्रशासकीय गरजा लक्षात घेऊन २०१५ मध्ये लोकप्रतिनिधींसाठी स्वतंत्र इमारतीचे काम सुरू करण्यात आले. ही इमारत २०१८ मध्ये कार्यान्वित झाली. त्यामुळे नगरसेवक आणि पदाधिकाऱ्यांच्या बैठकांची व्यवस्था झाली; मात्र प्रशासनासाठी जागेची कमतरता कायम राहिली आहे.

कर आकारणी व कर संकलन, शिक्षण मंडळ, स्थानिक संस्था कर (एलबीटी) आणि आरोग्य विभागासह महापालिकेच्या अनेक विभागांचे काम आजही वेगवेगळ्या इमारतींमधून सुरू आहे. त्यामुळे बैठका, प्रशासकीय कामकाज आणि दैनंदिन समन्वयासाठी अधिकारी व कर्मचाऱ्यांना वेगवेगळ्या कार्यालयांमध्ये जावे लागते. या पार्श्वभूमीवर महापालिकेचे सभागृह नेते गणेश बिडकर यांनी नव्या प्रशासकीय इमारतीची संकल्पना मांडली आहे.

शिवाजीनगरमधील शिवाजी आखाड्याची जागा नव्या प्रशासकीय केंद्रासाठी निश्चित करण्याबाबत विचार सुरू आहे. ही जागा महापालिकेच्या मालकीची असून, ती दीर्घकालीन भाडेपट्ट्याने देण्यात आली होती. आखाडा बालवाडी परिसरात स्थलांतरित करण्यासंदर्भात ज्येष्ठ नेते शरद पवार यांच्याशीही चर्चा करण्यात आली आहे. त्यांच्याकडून सकारात्मक प्रतिसाद मिळाल्यानंतर प्रस्तावाच्या हालचालींना वेग आल्याचे सांगण्यात येत आहे.

एकाच इमारतीत सर्व विभाग आणण्याचे नियोजन

नव्या प्रशासकीय इमारतीमध्ये महापालिकेचे विविध विभाग एकत्र आणण्याचे नियोजन आहे. सध्या वेगवेगळ्या ठिकाणी विखुरलेले विभाग एकाच ठिकाणी आल्यास प्रशासकीय समन्वय वाढणार आहे. आधुनिक तंत्रज्ञानाने सुसज्ज ऑनलाइन बैठक कक्ष, विविध समित्यांसाठी प्रशस्त सभागृहे तसेच नागरिकांच्या तक्रारी आणि कामांसाठी स्वतंत्र सुविधा उभारण्याचा प्रस्ताव आहे. नागरिकांना विविध कामांसाठी वेगवेगळ्या कार्यालयांचे हेलपाटे मारावे लागू नयेत आणि प्रशासकीय कामकाजाला गती मिळावी, हा त्यामागील प्रमुख उद्देश आहे.

प्रस्ताव अद्याप प्राथमिक टप्प्यात

शिवाजी आखाड्याचे बालवाडी येथे स्थलांतर, संबंधित जागेचा ताबा, नव्या प्रशासकीय इमारतीचा आराखडा आणि निधीची तरतूद या बाबींवर अद्याप अंतिम निर्णय झालेला नाही. प्रस्तावाचे सविस्तर सादरीकरण पदाधिकारी आणि महापालिका आयुक्तांसमोर करण्यात येणार आहे. त्यानंतरच प्रकल्पाच्या पुढील कार्यवाहीला अंतिम स्वरूप मिळणार आहे. त्यामुळे शिवाजी आखाड्याच्या जागेवर महापालिकेचे नवे प्रशासकीय केंद्र उभारण्याचा प्रस्ताव प्रत्यक्षात कधी येणार, याकडे आता लक्ष लागले आहे.