PMC School: पुण्यात भाजप नगरसेविकेने विद्यार्थ्यांकडून पाय धुवून घेतले : शाही पाद्यपुजनाचे फोटो व्हायरल होताच राष्ट्रवादी आक्रमक

Pune Municipal School: पुणे शहरातील सुखसागर नगर भागातील एका महापालिका शाळेत गुरुपौर्णिमेनिमित्त आयोजित कार्यक्रमादरम्यान विद्यार्थ्यांकडून भाजपच्या महिला नगरसेविका वर्षा भीमराव साठे यांचे पाय धुण्यात आल्याचा प्रकार समोर आला आहे. या घटनेचे फोटो सोशल मीडियावर व्हायरल झाल्यानंतर आता यावर तीव्र पडसाद उमटू लागले आहेत.

या प्रकाराचा राष्ट्रवादी युवक काँग्रेस (शरदचंद्र पवार)चे पुणे शहर उपाध्यक्ष अमोल परदेशी यांनी तीव्र निषेध व्यक्त केला आहे. शाळा ही शिक्षण, समता आणि वैज्ञानिक दृष्टिकोन जोपासण्याची ठिकाणे असून ती व्यक्तिपूजेचे केंद्र बनू नयेत, अशी भूमिका त्यांनी मांडली आहे.

भारतरत्न डॉ. बाबासाहेब आंबेडकर यांनी शिक्षणासाठी आयुष्यभर संघर्ष केला, याची आठवण करून देत विद्यार्थ्यांच्या हातात पुस्तक, पेन आणि संविधान असावे, कोणत्याही व्यक्तीची पूजा नव्हे, असे परदेशी यांनी नमूद केले आहे. विद्यार्थ्यांकडून लोकप्रतिनिधीचे पाय धुण्याचा हा प्रकार संविधानिक मूल्यांच्या विरोधात असून शिक्षण व्यवस्थेला काळिमा फासणारा असल्याची टीका त्यांनी केली.

या संपूर्ण प्रकरणाची निष्पक्ष चौकशी करून दोषींवर कठोर कारवाई करावी आणि भविष्यात अशा प्रकारच्या घटना पुन्हा घडू नयेत, यासाठी आवश्यक त्या उपाययोजना करण्यात याव्यात, अशी मागणी अमोल परदेशी यांनी केली आहे.