Pune Teachers Constituency : पुणे शिक्षक मतमोजणीत मोठा ट्विस्ट! भाजपच्या गावडेंची आघाडी कायम पण धाकधूक वाढली, दुसऱ्या फेरीत गणित बिघडणार?

Pune News, 28 Oct : पुणे शिक्षक मतदारसंघाच्या निवडणुकीच्या मतमोजणीत भाजपचे कौस्तुभ गावडे यांनी आघाडी कायम राखली आहे. मात्र, विजयासाठी आवश्यक असलेला २५ हजार ७५६ मतांचा कोटा अद्याप कोणत्याही उमेदवाराला पूर्ण करता आलेला नाही. त्यामुळे आमदारकीचा फैसला आता दुसऱ्या पसंतीच्या मतांवर अवलंबून असून, अंतिम निकालासाठी आणखी काही तास प्रतीक्षा करावी लागण्याची शक्यता आहे.

बुधवारी सकाळी 8 वाजेपर्यंतच्या आकडेवारीनुसार, भाजपच्या कौस्तुभ गावडे यांना १७ हजार ६५० मते मिळाली आहेत. शिवसेनेचे सचिन सानप ११ हजार ३८३ मतांसह दुसऱ्या क्रमांकावर, तर दत्तात्रय सावंत १० हजार ४०१ मतांसह तिसऱ्या क्रमांकावर आहेत. विद्यमान आमदार जयंत आसगावकर यांना ८ हजार ३९० मते मिळाली असून, ते चौथ्या क्रमांकावर आहेत.

१९ उमेदवार बाद; दुसऱ्या पसंतीच्या मतांवर लक्ष

पहिल्या पसंतीच्या मतमोजणीत कोणत्याही उमेदवाराला विजयासाठी आवश्यक असलेला कोटा गाठता आलेला नाही. त्यामुळे नियमानुसार मतमोजणीच्या एलिमिनेशन फेऱ्या सुरू आहेत. आतापर्यंत १९ उमेदवार बाद झाले असून, त्यांच्या मतपत्रिकांवरील दुसऱ्या पसंतीच्या मतांचे हस्तांतरण निर्णायक ठरणार आहे.

कौस्तुभ गावडे यांनी पहिल्या पसंतीच्या मतांमध्ये आघाडी घेतली असली, तरी ही आघाडी विजयात रूपांतरित करण्यासाठी त्यांना आणखी किती मतांची गरज भासते आणि बाद झालेल्या उमेदवारांची मते कोणाच्या पारड्यात पडतात, याकडे राजकीय वर्तुळाचे लक्ष लागले आहे.

आघाडी कायम, पण विजयाचे गणित अद्याप बाकी

गावडे यांची आघाडी कायम असली, तरी दुसऱ्या पसंतीच्या मतांच्या मोजणीमुळे निकालाचे गणित बदलण्याची शक्यता नाकारता येत नाही. त्यामुळे पुणे शिक्षक मतदारसंघात अखेर बाजी कोण मारणार, याची उत्सुकता शिगेला पोहोचली आहे. मतमोजणीच्या पुढील फेऱ्यांनंतरच विजयाचे अंतिम चित्र स्पष्ट होणार आहे.