Pimpri Chinchwad: बँकॉकमध्ये बसुन कोट्यवधींचा गंडा घालणारा 'मास्टरमाइंड' गजाआड: पुणे पोलिसांची मोठी कारवाई

Cyber Fraud Case: ऑनलाइन गुंतवणूक, नोकरी आणि आर्थिक लाभांचे आमिष दाखवून कोट्यावधी रुपयांची फसवणूक करणाऱ्या आंतरराष्ट्रीय सायबर रॅकेटविरोधात पिंपरी-चिंचवड सायबर पोलिसांनी मोठी कारवाई केली आहे. या प्रकरणातील प्रमुख आरोपी सौरभ काळे याला बँकॉकमधून ताब्यात घेण्यात आले असून, त्याला भारतात आणण्यात आले आहे. या कारवाईमुळे सायबर गुन्हेगारीच्या आंतरराष्ट्रीय रॅकेटचा भांडाफोड होण्याची शक्यता व्यक्त केली जात आहे.

आरोपी सौरभ काळे हा परदेशात बसून विविध ऑनलाइन प्लॅटफॉर्मच्या माध्यमातून भारतीय नागरिकांना आर्थिक फायद्याचे आमिष दाखवत असल्याचे समोर आले. तो फसवणुकीतून मिळालेली रक्कम विविध बँक खात्यांमध्ये वळवत होता. त्यामुळे त्याचा माग काढणे अवघड जात होते. सायबर पोलिसांनी तांत्रिक तपास आणि इंटरपोल यंत्रणेच्या मदतीने आरोपीपर्यंत पोहोचण्यात यश मिळवले.

सौरभ काळे हा दीर्घकाळापासून तपास यंत्रणांच्या रडारवर होता. त्याच्या विरोधात ऑनलाइन फसवणुकीचे अनेक गुन्हे नोंद असल्याची माहिती समोर येत आहे. आरोपी परदेशात वास्तव्यास असल्याने त्याला पकडणे आव्हानात्मक ठरत होते. मात्र इंटरपोल यंत्रणेच्या कारवाईतून त्याला बँकॉकमध्ये शोधून अटक करण्यात आली.

या प्रकरणाच्या तपासातून सायबर गुन्हेगारीसाठी वापरण्यात आलेली बँक खाती, आर्थिक व्यवहारांचे मार्ग आणि इतर सहकाऱ्यांची माहिती समोर येण्याची शक्यता आहे. त्यामुळे येत्या काळात आणखी काही संशयितांवर कारवाई होण्याची शक्यता पोलिस सूत्रांकडून व्यक्त केली जात आहे.

पोलिसांचे आवाहन

पिंपरी-चिंचवड सायबर पोलिसांनी नागरिकांना ऑनलाइन गुंतवणूक, पार्ट-टाईम जॉब, ट्रेडिंग किंवा मोठ्या परताव्याचे आमिष दाखवणाऱ्या अनोळखी लिंक आणि संदेशांपासून सावध राहण्याचे आवाहन केले आहे. सायबर फसवणुकीची शंका आल्यास तातडीने तक्रार नोंदविण्याचेही आवाहन करण्यात आले आहे.