Assembly Election 2024 : कोथरूड अन् वडगाव शेरीत राष्ट्रवादी शरद पवार पक्ष नाराजांवर टाकणार डाव?

आगामी विधानसभा निवडणुकीसाठी ( Assembly Election ) महाविकास आघाडी ( Mahavikas Aghadi ) म्हणून निवडणुकीला सामोरे जात असताना राष्ट्रवादी काँग्रेस शरद पवार पक्षाकडून पुणे शहरातील आठ जागांपैकी सहा जागांवरती दावा सांगण्यात आला आहे. यामध्ये वडगाव शेरी, हडपसर, शिवाजीनगर, पुणे कॅन्टोन्मेंट, खडकवासला, कोथरूड आणि पर्वती विधानसभा मतदारसंघाचा समावेश आहे.

मागील विधानसभा निवडणुकीत राष्ट्रवादी काँग्रेस ( Ncp ) एक संघ असताना पुण्यातील दोन जागा जिंकण्यात यश आलं होतं. हडपसर आणि वडगाव शेरी या दोन मतदारसंघांमध्ये सध्या राष्ट्रवादी काँग्रेसचे आमदार आहेत. मात्र, हे दोन्ही आमदार अजित पवारांसोबत आहेत. त्यामुळे जागा वाटपात या दोन्ही मतदारसंघावर राष्ट्रवादी काँग्रेस शरद पवार पक्षाचा प्रबळ दावा असणार आहे.

हडपसर विधानसभा मतदारसंघाचा विचार केल्यास या मतदारसंघामधून शहराध्यक्ष प्रशांत जगताप हे इच्छुक असून त्यांच्या उमेदवारीसाठीचा दावा जास्त प्रबळ मानला जात आहे. तर, वडगाव शेरी विधानसभा मतदारसंघामध्ये शरद पवार ( Sharad Pawar ) गटाकडे तितका प्रबळ, असा दावेदार सध्या तरी पाहायला मिळत नाही. दुसरीकडे महायुतीमध्ये तुल्यबळ, असे दावेदार पाहायला मिळत आहेत.

राष्ट्रवादी काँग्रेस अजित पवार गटाचे सध्याचे आमदार सुनील टिंगरे हे पुन्हा निवडणुकीच्या रिंगणात उतरतील, असं बोलले जात आहे. भाजपमध्ये माजी आमदार जगदीश मुळीक आणि बापू पठारे, माजी नगरसेवक अनिल उर्फ बॉबी टिंगरे यांच्यासारखे कसलेले उमेदवार आपल्याला उमेदवारी मिळावी म्हणून 'फिल्डिंग' लावून तयार आहेत. यातील एखादा नाराज उमेदवाराला सोबत घेऊन हा मतदारसंघ सर करता येईल का? याची चाचपणी सध्या शरद पवार गटाकडून सुरू आहे.

वडगाव शेरीसोबतच कोथरूड विधानसभा मतदारसंघात देखील शरद पवार गटानं चाचपणी सुरू केली आहे. हा मतदारसंघ शिवसेना ठाकरे गटाला मिळण्याची शक्यता आहे. या मतदारसंघातून शरद पवार गट उमेदवाराची चाचपणी करत आहे. भाजपला शह देण्यासाठी त्यांच्यातीलच काही नाराज आपल्याकडे वळवण्याची खेळी आगामी विधानसभा निवडणुकीत होऊ शकते, असं चित्र सध्या दिसत आहे. याची जबाबदारी खासदार सुप्रिया सुळे यांना देण्यात आल्याची चर्चा देखील राजकीय वर्तुळात सुरू आहे.

( Edited By : Akshay Sabale )