Pune NCP Alliance : शरद पवारांच्या सूचनेनंतर पुण्यातील तंटा मिटवण्यासाठी प्रदेशाध्यक्ष मैदानात उतरणार

Pune News, 09 Dec : पुणे महापालिका निवडणुकीमध्ये उपमुख्यमंत्री अजित पवार यांची राष्ट्रवादी काँग्रेस आणि राष्ट्रवादी काँग्रेसचे शरदचंद्र पवार पक्ष एकत्र येणार याबाबतच्या चर्चांना उधान आलं होतं. या पार्श्वभूमीवर शरद पवार यांच्या पक्षाचे शहराध्यक्ष प्रशांत जगताप यांनी पक्षाध्यक्ष शरद पवार यांची भेट घेतली.

त्यानंतर अजित पवारांच्या पक्षाबाबत आघाडीचे अधिकृत भूमिका प्रदेशाध्यक्ष जाहीर करणार असल्याचे सांगितलं. त्याबाबतच्या सूचना प्रदेशाध्यक्ष शशिकांत शिंदे यांना शरद पवार यांनी दिल्या असल्याचे प्रशांत जगताप म्हणाले होते.

प्रशांत जगताप यांनी शरद पवारांची भेट घेतल्यानंतर राजकारण झपाट्याने बदललं असून जगतापांनी अजित पवारांच्या राष्ट्रवादीसोबत आघाडी न करण्याच्या घेतलेल्या भूमिकेबाबत शहरातील काही पदाधिकाऱ्यांनी फारकत नोंदवली आहे. यामुळे शहरांमध्ये पक्षांतर्गत दोन गट पडले असल्याचे चित्र पाहायला मिळत आहे.

या पार्श्वभूमीवर प्रदेशाध्यक्ष शशिकांत शिंदे हे पुणे दौऱ्यावर येणार असून या सगळ्या गोष्टींचा सोक्षमोक्ष लावणार असल्याचं सांगितल्या जात आहे. दरम्यान शरद पवारांच्या सूचनेनंतर आता शरद पवार गटाचे प्रदेशाध्यक्ष पुणे दौऱ्यावर येणार असून 19 आणि 20 डिसेंबर असं दोन दिवस प्रदेशाध्यक्ष पुण्यामध्ये ठाण मांडून असणार आहेत.

या दौऱ्यादरम्यान ते पुणे आणि पिंपरी चिंचवड शहरातील स्थानिक पदाधिकाऱ्यांसोबत बैठक घेऊन परिस्थितीचा आढावा घेतील तसेच पक्षातील स्थानिक नेत्यांचं मत देखील जाणून घेणार आहेत. पिंपरी चिंचवड मध्ये शरद पवारांच्या पक्षांमधील बहुतांश पदाधिकारी हे अजित पवारांच्या राष्ट्रवादीसोबत जाण्यासाठी सकारात्मक आहे. त्या उलट पुण्यामध्ये मात्र पक्षातील दोन गट वेगवेगळे दावे करताना पाहायला मिळत आहेत.

या नेत्यांशी भेटून शशिकांत शिंदे हे चर्चा करणार असून चर्चेनंतर संभ्रम मिटवण्याचा प्रयत्न करणार आहे. या जम्बो बैठका झाल्यानंतर पुण्यामध्ये अजित पवारांच्या राष्ट्रवादीसोबत जायचं का? नाही याबाबतचा निर्णय 20 डिसेंबरला होणार असल्याचं सांगितलं जात आहे. अजित पवार यांच्यावर आघाडीबाबतच्या प्रश्नासाठी दोन्ही पक्षाचे कार्यकर्ते 20 डिसेंबरकडे डोळे लावून बसले आहेत.