Sharad Pawar : शरद पवारांनी आघाडीचं टेन्शन वाढवलं; '...म्हणून लोकसभेला दोन पावलं मागं सरलो'

Maharashtra Political News : लोकसभा निवडणुकीत शरद पवार गटाचे 10 जागांपैकी 8 खासदार निवडून आले. यावेळी आपल्याला जास्त जागा मिळायला हव्या होत्या. मात्र महाविकास आघाडीत बिघाडी नको म्हणून कमी जागांवर समाधान मानले, असे प्रतिपादन ज्येष्ठ नेते शरद पवार यांनी केले.

आता या विधानामुळे आगामी विधानसभा निवडणुकीत जास्त जागा मिळवण्यासाठी शरद पवार गटाकडून जोरदार बार्गेनिंग केले जाण्याची शक्यता असल्याची चर्चा सुरू झाली आहे.

पुण्यातील निसर्ग मंगल कार्यालयात राष्ट्रवादी काँग्रेस शरदचंद्र पवार पक्षाची बैठक पार पडली. यावेळी शरद पवार Sharad Pawar बोलत होते. आता झालेल्या लोकसभा निवडणुकीत आपल्याला जास्त जागा मिळायला हव्या होत्या. मात्र महाविकास आघाडीत ऐक्य राहण्यासाठी दोन पावले मागे सरलो. एकत्रित लढलो म्हणूनच निवडणुकीत यश मिळाले, असेही पवारांनी स्पष्ट केले. त्यांच्या या विधानाने मात्र राजकीय वर्तुळातून भुवया उंचावल्या आहेत. लोकसभेवर भाष्य केले असले तरी शरद पवारांच्या टार्गेटवर विधानसभा निवडणूक असल्याचे बोलले जात आहे.

विधानसभेच्या कामाला लागा

या बैठकीत पवारांनी लोकसभा निवडणुकीचा संदर्भ देत नेत्यांसह पदाधिकारी, कार्यकर्त्यांना विधानसभा निवडणुकीच्या कामाला लागण्याचे आवहान केले. ते म्हणाले, राज्यातील लोकांचा दिल्लीशी फारसा संबंध येत नाही. राज्यात सर्वात जास्त प्रश्न असतात. लोकसभेत चांगले यश मिळाले आहे. आता आपल्याला राज्य हातात घ्यायचे आहे. त्यादृष्टीने उद्यापासूनच विधानसभा निवडणुकीच्या कामाला लागा, असेही पवारांनी आदेश दिले आहेत.

जागा वाटपात काय होणार?

लोकसभा निवडणुकीत चांगले यश मिळाल्यानंतर महाविकास आघाडीतील ठाकरे गट आणि काँग्रेसने स्वबळाची भाषा केली. लोकसभेत शरद पवार गटाने फक्त 10 जागा लढवून 8 जिंकल्या. तर ठाकरे गटाने 21 पैकी 9 आणि काँग्रेसने 17 पैकी 13 जागांवर यश मिळवले आहे. यात शरद पवार गटाचा सर्वात जास्त 80 टक्के स्ट्राईक रेट राहिला आहे. त्यामुळे विधानसभा निवडणुकीत शरद पवार गट जास्त जागांचा आग्रह करणार असल्याची शक्यता वर्तवली जात आहे. मात्र जागा वाटपावेळी ठाकरे आणि काँग्रेसकडून काय भूमिका घेतली जाणार, हे पाहणे औत्सुक्याचे ठरणार आहे.