Ravindra Dhangekar: शिवसेना-भाजपच्या युतीचा अद्यापही स्पष्टता नाही! अजित पवारांच्या भेटीनंतर धंगेकर म्हणाले...

Pune News : आता अवघे काही तास उमेदवारी अर्ज दाखल करण्यासाठी राहिले असताना देखील भाजप आणि शिवसेनेतील युतीच् घोंगडं अजून भिजतच पडला आहे. पुणे महापालिका निवडणुकीमध्ये भाजप उपमुख्यमंत्री एकनाथ शिंदे यांच्या शिवसेने सोबत युती करणार आहे. असं असलं तरी भाजप 165 जागांपैकी शिवसेनेला 15 हुन अधिक जागा सोडण्यासाठी सकारात्मक नाही तर दुसरीकडे सेना 25 जागा मिळाव्यात यासाठी अडून बसली आहे.

त्यामुळे पुण्यात अद्याप तरी शिवसेना आणि भाजपची अधिकृत बाबतची घोषणा झालेली नाही. असं असताना देखील दुसरीकडे भाजपने मात्र आपले उमेदवार निश्चित केले असून त्यांना एबी फॉर्म वाटण्यात देखील आले आहेत. भाजपाच्या काही नेत्यांनी उमेदवारी अर्ज देखील दाखल केले आहेत. त्यामुळे भाजप आणि शिंदे यांच्या शिवसेनेमधील युतीचं काय? होणार याचा प्रश्न सर्वांनाच पडला आहे.

एकीकडे युतीच्या चर्चा सुरू असताना या चर्चांमध्ये पुणे शिवसेनेचे महानगर प्रमुख असलेल्या रवींद्र धंगेकर यांना दूर ठेवण्यात आल्या असल्याचं चित्र पाहायला मिळालं. धंगेकर यांना आपल्या कुटुंबासाठी युतीमध्ये दोन जागा अपेक्षित आहेत. त्यांची पत्नी आणि मुलगा यंदाच्या महापालिका निवडणुकीसाठी इच्छुक असल्याचे सांगितले जात आहे. मात्र भाजपने यातली एक जागा सोडण्याची तयारी दर्शवली आहे. धंगेकरांच्या पत्नीला जागा सोडण्यासाठी भाजप सकारात्मक आहे. मात्र धांगेकर यांचा मुलगा प्रणव धांगेकर यांना युतीमध्ये जागा सोडण्यासाठी भाजप सकारात्मक नसल्याचं चित्र आहे.

त्यामुळे रवींद्र धंगेकर हे प्रणव धंगेकर यांना अपक्ष अथवा उपमुख्यमंत्री अजित पवार यांच्या राष्ट्रवादी काँग्रेस कडून मैदानात उतरवण्याच्या तयारीत असल्याचं सांगितलं जात आहे. एकीकडे युतीचं भिजत पडलेलं घोंगडं आणि दुसरीकडे धंगेकरांच्या मुलाला युतीमधून तिकीट मिळण्याच्या शक्यता मावळी असल्याचे चित्र आहे. या पार्श्वभूमीवर रवींद्र धंगेकर यांनी उपमुख्यमंत्री अजित पवार यांची पुण्यातील जिजाई निवासस्थानी जाऊन भेट घेतली आहे.

या भेटीवेळी पत्रकारांनी धंगेकर यांना ही भेट प्रणव यांच्यासाठी आहे का ? असं विचारलं असता त्यांनी ही भेट पुणेकरांसाठी असल्याचं सांगितलं आहे असं असलं तरी पक्षाकडून आपल्याला या भेटीबाबत कोणतीही सूचना नसल्याचे देखील रवींद्र धंगेकर यांनी स्पष्ट केला आहे. त्यामुळे धंगेकर यांनी ही भेट स्वतःहून घेतली असल्याचं समोर आला आहे.

तसंच या भेटीमध्ये आपण अजित पवार यांना कोणताही प्रस्ताव दिला नसल्याचा देखील धंगेकर यांनी स्पष्ट केलं. आपण अजित पवार यांची भेट घेतली असली त्यांनी राष्ट्रवादी काँग्रेस आणि शिवसेनेबाबतच्या युतीला ग्रीन सिग्नल दिला नसल्याचे देखील धंगेकर यांनी स्पष्ट केला आहे.

एकूणच पक्षाच्या सूचना नसताना कोणताही प्रस्ताव नसताना धंगेकर हे अजित पवारांच्या भेटीला का ? गेले हा प्रश्न उपस्थित केला जात आहे. तसेच एकीकडे भाजपबरोबर जागांचा तिढा सुटत नसल्याने हा दबाव तंत्राचा कोणता भाग होता का ? अथवा रवींद्र धंगेकर हे प्रणव धंगेकर यांच्या उमेदवारीसाठी अजित पवारांच्या भेटीला गेले होते का ? असा देखील प्रश्न उपस्थित केला जात आहे.