Sushma Andhare : अजितदादांचा पक्ष सुनील तटकरे टेकओवर करतायेत? मिटकरी, ठोंबरेच्या हकालपट्टीनंतर सुषमा अंधारेंनी व्यक्त केली वेगळीची भीती

Sushma Andhare News : अजित पवारांच्या राष्ट्रवादी काँग्रेसच्या नवीन प्रवक्त्यांची यादी नुकतीच जाहीर करण्यात आली. या यादीतून अमोल मिटकरी आणि रुपाली पाटील ठोंबरे यांची प्रवक्तेपदावरून उचलबांगडी करण्यात आली आहे. तर, सुरज चव्हाण यांना प्रवक्तेपद मिळाले आहे. रुपाली ठोंबरे यांच्यासोबत शिवसेना उद्धव बाळासाहेब ठाकरे पक्षाच्या उपनेत्या सुषमा अंधारे यांची राजकारणाच्या पल्याड मैत्री असल्याचे अनेकदा दिसून आले आहे.

सुषमा अंधारे यांनी रुपाली ठोंबरे पाटील यांची प्रवक्तेपदावरून उचलबांगडी झाल्यानंतर फेसबूक पोस्ट करत वेगळीच भीती व्यक्त केली. त्या म्हणाल्या, अमोल मिटकरी आणि रूपाली ठोंबरे हे दोन्ही प्रवक्ते कायम दादांसाठी खिंड लढवत असतात मात्र त्यांना या यादीत स्थान नाही.थोडक्यात काय जो दादांची बाजू घे त्याला बाहेरचा रस्ता दाखवला जाईल. तटकरे हळूहळू पक्ष टेकओवर तर करत नाहीत ना ?'

'मित्र पक्षातल्या आमदारांकडून दादांवर पराकोटीची जहरी टीका होताना अतिशय मौन बाळगणारे सुरज चव्हाण तटकरेंवर कोणी चकार शब्द काढला तर अगदी मारामारी करण्यापर्यंतची तत्परता दाखवू शकतात. कदाचित म्हणूनच या यादीत सुरज चव्हाणला स्थान आहे.', असा टोलाही अंधारे यांनी लगावला आहे.

रुपाली ठोंबरेंना दोन पक्षाची ऑफर

रुपाली पाटील ठोंबरे यांनी आपल्या पक्षाच्या महिला प्रदेशाध्यक्ष रुपाली चाकणकर यांच्यावर टीका महागात पडल्याची चर्चा आहे. चाकणकरांसोबत वाद भोवल्याने त्यांच्याकडील प्रवक्तेपद काढून घेण्यात आल्याचे सांगितले जात आहे. दरम्यान, रुपाली ठोंबरे यांना भाजप आणि शिंदेंच्या शिवसेनेतून ऑफर असल्याचे बोलले जात आहे. मात्र, याबाबत कुठलीही अधिकृत माहिती समोर आली नाही. दरम्यान, ठोंबरे यांनी आपण अजितदादांना भेटणार असल्याचे सांगितले होते. दादा हे न्याय करणारे व्यक्त आहेत, असे देखील त्यांनी म्हटले होते.