सोमय्यांवर हल्ला झालेल्या ठिकाणापासून भाजपाचे कार्यालय दोन मिनिटांच्या अंतरावर

पुणे : भारतीय जनता पार्टीचे नेते माजी खासदार किरीट सोमय्या (Kirit Somaiya) यांच्यावर पुणे महापालिकेत हल्ला झाला. या जागेपासून पक्षाचे नवे शहर कार्यालय केवळ पायी दोन मिनिटांच्या अंतरावर आहे.विशेष म्हणजे पुण्यात आल्यानंतर नेहमी त्यांच्यासोबत असणारे पुण्यातील कार्यकर्तेदेखील यावेळी त्यांच्याबरोबर नव्हते.

पुण्यातील जम्बो कोवीड सेंटरमध्ये झालेल्या भ्रष्टाचाराची चौकशी करण्याची मागणी करणासाठी सोमय्या पुणे महापालिकेत गेले होते.महापालिकेचे अतिरिक्त आयुक्त कुणाल खेमणार यांना ते चौकशीच्या मागणीचे निवेदन देणार होते.दुपारी चारच्या सुमारास सोमय्या महापालिकेत पोचले.महापालिकेच्या मुख्य इमारतीच्या जुन्या प्रवेशद्वारावर काही शिवसैनिक त्यांना निवेदन देण्यासाठी आले. त्यानंतर त्यांना धक्काबुक्की करण्यात आली.यावेळी काहीजणांच्या हातात मोठमोठे दगड होते, असे प्रदेशाध्यक्ष चंदक्रांत पाटील यांनी सांगितले.

जम्बो कोवीडमधील भ्रष्टाचाराची चौकशी करण्यात यावी या मागणीसाठी आधी त्यांनी शिवाजीनगर पोलीस ठाण्यात तक्रार दिली.त्यावेळी शिवाजीनगर मतदारसंघातील काही पदाधिकारी व कार्यकर्ते त्यांच्यासोबत होते.शिवाजीनगर पोलीस ठाण्यातून निघून ते पुणे महापालिकेत अतिरिक्त आयुक्त कुणाल खेमणार यांना निवेदन देऊन मुंबईला निघणार होते.वास्तविक सोमय्या यांनी गेल्या दोन वर्षात कॉंग्रेस-राष्ट्रवादी व शिवसेनेशी संबंधित विविध नेत्यांच्या भ्रष्टाचाराची अनेक प्रकरणे जनतेसमोर आणली आहे.मग या प्रकरणातच त्यांच्यावर हल्ला होण्याचे कारण काय असा प्रश्‍न उपस्थित करण्यात येत आहे. पुण्यातल्या जम्बो कोवीडच्या चौकशीच्या मागणीचा इतका राग कुणाला आला, असेही विचारण्यात येऊ लागले आहे.

दरम्यान, या प्रकरणाची संपूर्ण चौकशी करण्यात येईल, असे गृहमंत्री दिलीप वळसे-पाटील यांनी शनिवारी जाहीर केल्यानंतर आज सकाळी सात जणांविरोधात गुन्हा दाखल करण्यात आला आहे. मात्र,अद्याप आरोपींना शोधण्यात पोलिसांना अद्याप यश आलेले नाही.पोलीस आरोपींना लवकरात लवकर शोधून अटक करणार का असाही प्रश्‍न विचारण्यात येऊ लागला आहे.

Edited By : Umesh Ghongade