Trupti Desai : कराडच्या आश्रयदात्यांनाही अटक करा; कोण घालतंय पाठिशी?

Pune News : वैष्णवी हगवणे मृत्यू प्रकरणामध्ये प्रमुख संशयित आरोपी असलेल्या राजेंद्र हगवणे आणि सुशील हगवणे हे फरार असताना त्यांना मदत करणाऱ्या पाच लोकांना पुणे पोलिसांनी अटक केली आहे. कर्नाटक मधील एका माजी मंत्र्यांच्या मुलाचा देखील यात समावेश आहे. प्रीतम पाटील, मोहन भेगडे, बंडू फाटक, अमोल जाधव आणि राहुल जाधव अशा पाच जणांना पोलिसांनी बेड्या ठोकल्या आहेत.

एकीकडे वैष्णवी हगवणे प्रकरणांमध्ये पोलिसांनी अत्यंत तत्परता दाखवत राजेंद्र हगवणे यांना फरार असताना मदत केल्याप्रकरणी अटकेची कारवाई केली. मात्र दुसरीकडे वाल्मीक कराड फरार असताना त्याला मदत करणारे मात्र मोकाट असल्याचा मुद्दा सामाजिक कार्यकर्त्या तृप्ती देसाई यांनी उपस्थित केला आहे.

तृप्ती देसाई म्हणाल्या, वैष्णवी हगवणे मृत्यू प्रकरणांमध्ये फरार असलेले राजेंद्र हगवणे आणि सुशील हगवणे यांना व्हीआयपी ट्रीटमेंट देत मदत करण्याचा प्रयत्न केला. त्या पाचही जणांना पोलिसांनी अटक केली आहे. संतोष देशमुख यांच्या हत्या प्रकरणांमध्ये फरार असताना वाल्मीक कराड याला देखील अनेकांनी आश्रय दिला असल्याचे अनेक पुरावे समोर आले आहेत.

त्यामध्ये दिंडोरीच्या गुरुपीठामध्ये दोन दिवस केलेला मुक्काम असेल, नाशिक मधील ज्योतिषाची भेट असेल तसेच पुण्यात देखील वाल्मीक कराडने कोणाकडे वास्तव्य केले होतं, याची देखील माहिती समोर आली आहे, असं असताना देखील त्यातील कुठल्याही आरोपीला अटक करण्यात आलेली नाही.

वैष्णवी हगवणे प्रकरणामध्ये आरोपींना मदत करणाऱ्यांना अटक करण्यात आली, ही स्वागतार्ह बाब आहे. मात्र कायदा सर्वांना समान आहे. मात्र एका प्रकरणामध्ये एक न्याय आणि दुसऱ्या प्रकरणांमध्ये दुसरा अशी सध्याची परिस्थिती दिसत आहे. वाल्मीक कराड याला वरिष्ठ पातळीवरून पाठिशी घालण्याचा प्रयत्न केला जात आहे.

वाल्मीक कराड फरार असताना त्याला ज्यांनी आश्रय दिला ज्यांनी व्हीआयपी ट्रीटमेंट दिली. त्यातील कोणालाही अद्याप आरोपी करण्यात आलेलं नाही. तसेच कुणाला अटक देखील झाली नाही. त्यामुळे या प्रकरणातील आश्रय देणाऱ्यांना राजाश्रय मिळतोय का? या आश्रयदात्यांना कोणी राजकीय व्यक्ती पाठीशी घालताय का? याचा देखील तपास होऊन या सर्वांना अटक झाली पाहिजे, अशी मागणी तृप्ती देसाई यांनी केली आहे.