Shivsena Vs NCP : ठाकरेंचे शिवसैनिक सुळेंवर नाराज; पण अंधारे म्हणतात, 'आम्ही ढाल तलवारी काढल्या नाहीत...'

Pune News : विधानसभा निवडणुकीनंतर महाविकास आघाडीमध्ये सर्वकाही अलबेल असल्याचे चित्र पाहायला मिळत नाही. महाविकास आघाडीतील नेते एकामेकांवर टीका करताना पाहायला मिळत आहेत. अशातच शिवसेना उद्धव बाळासाहेब ठाकरे पक्षाच्या पुण्यामधील बैठकीमध्ये पदाधिकाऱ्यांनी सुप्रिया सुळे (Supriya Sule) यांच्याबाबत जाहीर नाराजी व्यक्त केली आहे.

शिवसेना (Uddhav Thackeray) उद्धव बाळासाहेब ठाकरे पक्षाच्या पुण्यामध्ये झालेल्या बैठकीमध्ये नेमकं कशा प्रकारचे नाराजीनाट्य रंगले याबाबतची माहिती नेत्या सुषमा अंधारे यांनी दिली आहे. अंधारे म्हणाल्या, इंदापूर, बारामती, दौंड आणि पुरंदरच्या पदाधिकाऱ्यांनी काल झालेल्या पक्षाच्या बैठकीत नाराजी व्यक्त केली. मात्र ती नाराजी पक्षाबाबत नसून खासदार सुप्रिया सुळे यांच्या बाबत होती.

लोकसभेच्या निवडणुकीदरम्यान छातीच्या कोट करून आम्ही काम केलं मात्र सुप्रिया सुळे यांच्याकडून ज्या पद्धतीचा प्रतिसाद शिवसेना उद्धव बाळासाहेब ठाकरे पक्षाच्या पदाधिकाऱ्यांना आणि कार्यकर्त्यांना मिळायला हवा तसा मिळत नाही अशी तक्रार पदाधिकाऱ्यांची होती.

सुप्रिया सुळे यांच्याबाबतचे नाराजी म्हणजे लगेच ढाल-तलवारी काढल्या असं नाही. ताई आमच्या हक्काच्या आहेत, त्यामुळे आम्हाला त्यांच्यावर नाराज होण्याचा हक्क आहे. त्याच भूमिकेतून कार्यकर्त्यांनी आपली नाराजी कळवली असून पुढील काळात बैठक घेऊन यावर तोडगा काढण्यात येईलं, असंही सुषमा अंधारे म्हणाल्या.

याबाबतच्या तक्रारी ऐकून घेतल्यानंतर खासदार संजय राऊत यांनी सुप्रिया सुळे यांच्याशी पार्लमेंट सेशन दरम्यान याबाबत चर्चा करणार असल्याचे सांगितले आहे. तसेच दौंड बारामती, इंदापूर आणि पुरंदरमधील शिवसेनेचे पदाधिकारी आणि सुप्रिया सुळे यांच्यासोबत खासदार संजय राऊत यांची उपस्थितीत बैठक लावण्यात येईल. असा आश्वासन संजय राऊत यांनी दिल आहे.